សហភាពអឺរ៉ុបកាលពីថ្ងៃអាទិត្យ (១២ វិច្ឆិកា) បានថ្កោលទោសក្រុមហាម៉ាស ចំពោះ​ការ​ប្រើ​ប្រាស់ «មន្ទីរពេទ្យ និងជនស៊ីវិលជាខែលការពារខ្លួន» នៅក្នុងតំបន់ហ្កាហ្សា ខណៈ​ជំរុញ​ឱ្យ​អ៊ីស្រាអែលបង្ហាញ «ការអត់ធ្មត់ជាអតិបរមា» ដើម្បីការពារជនស៊ីវិល។

យោងតាមបុគ្គលិកពេទ្យបាននិយាយថា បណ្ដាមន្ទីរ​ពេទ្យ​នៅ​ភាគ​ខាង​ជើង​នៃ​តំបន់​ហ៊ុមព័​ទ្ធ​ប៉ា​ឡេស្ទីន​មួយ​នេះ ត្រូវបានឡោមព័ទ្ធដោយកងកម្លាំងអ៊ីស្រាអែល ហើយស្ទើរ​តែ​មិន​អាច​មើល​ថែ​ទាំ​អ្នក​ជំងឺ​ដែលនៅខាងក្នុងបាន។

មន្ទីរពេទ្យធំជាងគេ និងធំទីពីររបស់តំបន់ហ្កាហ្សា គឺមន្ទីរពេទ្យ អាល់ស៊ីហ្វា (Al Shifa) និង​មន្ទីរ​ពេទ្យ អាល់គុតស៎ (Al-Quds) បាននិយាយថា ពួកគេកំពុងផ្អាកប្រតិបត្តិការ។

អ៊ីស្រាអែល​និយាយថា ក្រុមហាម៉ាសបានដាក់មជ្ឈមណ្ឌលបញ្ជាការនៅក្រោម និងក្បែរ​មន្ទីរ​ពេទ្យ​នានា ហើយចាំបាច់ត្រូវតែរុករកពួកគេ ដើម្បីរំដោះចំណាប់ថ្នូរប្រហែល ២០០នាក់ ដែល​ពួក​សកម្ម​ប្រយុទ្ធទាំងនោះបានចាប់ខ្លួននៅក្នុងប្រទេសអ៊ីស្រាអែល ក្នុងការវាយ​ប្រហារ​កាល​ពី​ជាង​មួយ​ខែមុន ប៉ុន្តែក្រុមហាម៉ាស បានបដិសេធ​ថា​ខ្លួន​មិន​បាន​ប្រើប្រាស់​មន្ទីរ​ពេទ្យ​តាម​របៀប​នេះ​នោះ​ទេ។

ប្រធានគោលនយោបាយការបរទេសរបស់សហភាពអឺរ៉ុប លោក ចូសែប បូរ៉ែល (Josep Borrell) បាននិយាយនៅក្នុងសេចក្តីថ្លែងការណ៍មួយ ដែលបាន​ចេញ​ផ្សាយ​ជំនួស​នាម​ឲ្យ​ប្លុក​ទាំង ២៧ប្រទេសនេះថា «សហភាពអឺរ៉ុប ថ្កោលទោសក្នុងការប្រើប្រាស់មន្ទីរពេទ្យ និងជនស៊ីវិល ជា​ខែលការពារខ្លួនរបស់ក្រុមហាម៉ាស។ ជន​ស៊ីវិល​ទាំង​អស់​ត្រូវ​តែ​ទទួល​បាន​ការ​អនុញ្ញាត​ឱ្យ​ចាក​ចេញ​ពី​តំបន់ប្រយុទ្ធ»៕