មេដឹកនាំអារ៉ាប់ និងឥស្លីម បានរិះគន់ «ឧក្រិដ្ឋកម្មសង្រ្គាម»របស់អ៊ីស្រាអែល នៅតំបន់ហ្កាហ្សា ក្នុង​កិច្ចប្រជុំកំពូលមួយ ក្នុងទីក្រុងរីយ៉ាដ ជាទីដែលប្រធានាធិបតីអ៊ីរ៉ង់ អ៊ីប្រាហ៊ី រ៉េស៊ី (Ebrahim Raisi) បានជួបជាមួយព្រះអង្គម្ចាស់អារ៉ាប៊ីសាអ៊ូឌីត ម៉ូហាម៉េដ ប៊ីន សាលម៉ាន (Mohammed bin Salman) ក្នុងកិច្ចប្រជុំជាសាធារណៈលើកដំបូង។

កិច្ចប្រជុំកំពូលវិសាមញ្ញ ដែលបានប្រមូលផ្តុំមេដឹកនាំចំនួន ៥៧រូប បាន​ទាមទារ​ឲ្យ​ក្រុម​ប្រឹក្សា​សន្តិសុខ​អង្គការសហប្រជាជាតិទទួលយក «ការសម្រេចចិត្តដ៏ម៉ឺងម៉ាត់ និងជាប់កាតព្វកិច្ច» ដើម្បី​បញ្ឈប់​ការ​ឈ្លានពានជាមួយនឹងការប្រយុទ្ធយ៉ាងជ្រៅ នៅក្នុងតំបន់ហ្កាហ្សា ដែលកំពុង​ដំណើរ​ការ​រវាង​អ៊ីស្រាអែល និងក្រុមហាម៉ាស។

សេចក្តីសម្រេចចុងក្រោយនោះ បានឲ្យដឹងថា៖​«យើង​ថ្កោល​ទោស​ការ​ឈ្លាន​ពាន​របស់​អ៊ីស្រាអែល​ប្រឆាំងនឹងតំបន់ហ្កាហ្សាស្ទ្រីប ឧក្រិដ្ឋកម្មសង្រ្គាម និងការសម្លាប់រង្គាលដ៏ព្រៃផ្សៃ ឃោរឃៅ និង​អមនុស្សធម៌​ដែល​បាន​ប្រព្រឹត្ត​ដោយ​រដ្ឋាភិបាល​កាន់​កាប់​អាណានិគម​ប្រឆាំង​នឹង​ប្រជាជន​ប៉ាឡេស្ទីន រួមទាំងនៅតំបន់វេសបែង និងទីក្រុងហ្ស៊េរុយសាឡិមខាងកើត (East Jerusalem) ដែលបានគ្រប់គ្រងដោយអ៊ីស្រាអែល។ យើង​ទាម​ទារ​ឲ្យ​បញ្ឈប់​ការ​ឈ្លាន​ពាន​នេះ​ជា​បន្ទាន់​» កិច្ចប្រជុំកំពូល បានច្រានចោលការចាត់ទុក«សង្គ្រាមសងសឹកនេះថាជា [ផ្នែកមួយនៃ] ការ​ការពារខ្លួន» និងទាម​ទារ​ឲ្យមាន​ក្បួន​រថយន្ត​ជំនួយ​មនុស្ស​ធម៌​ចូល​ទៅ​ដល់​តំបន់​ដែល​កំពុង​មាន​ជម្លោះ​នេះ​៕