អាជ្ញាធរប្រទេសអ៊ុយក្រែន បាននិយាយថា ការវាយប្រហារដោយកងកម្លាំងរុស្ស៊ី បាន​សម្លាប់​មនុស្ស​ជាង ៨០០នាក់ នៅក្នុងតំបន់ Kherson ភាគខាងត្បូង ក្នុងរយៈពេលមួយ​ឆ្នាំ​កន្ល​ង​ទៅ​នេះ​។ កាលពីថ្ងៃសៅរ៍ គឺជាខួបលើកទីមួយនៃការរំដោះទីក្រុង Kherson ពីការកាន់កាប់របស់រុស្ស៊ី។

ការិយាល័យរដ្ឋអាជ្ញាប្រចាំតំបន់ Kherson និយាយថា មនុស្សជាង ៨០០នាក់ រួមទាំងកុមារ បាន​ស្លាប់​ដោយសារតែការបាញ់ផ្លោង និងការវាយប្រហារផ្សេងទៀតរបស់កងកម្លាំងរុស្ស៊ី ព្រមទាំង​ទឹក​ជំនន់​ដែល​បណ្តាលមកពីការបំផ្លាញទំនប់ទឹក Kakhovka កាលពីខែមិថុនា។

ប្រធានាធិបតីអ៊ុយក្រែន លោក Volodymyr Zelenskyy បានបញ្ជាក់ថា ប្រទេសរបស់​លោក​នឹង​បន្ត​ការ​វាយបក ខណៈកំពុងជំរុញវិស័យការការពារជាតិរបស់ខ្លួន។ លោកបាននិយាយ​នៅ​ក្នុង​សុន្ទរកថា​តាម​វីដេអូមួយ ដែលបានចេញផ្សាយកាលពីថ្ងៃសៅរ៍ថា កងកម្លាំងសន្តិសុខ និង​ការពារ​ជាតិ​របស់​យើងនឹងឆ្លើយតបទៅនឹងការវាយប្រហាររបស់កងទ័ពរុស្ស៊ីលើតំបន់ Kherson និង​ភូមិ​នានា​នៅ​តំបន់ Kherson។

លោក Zelenskyy និយាយថា សប្តាហ៍នេះបានបង្ហាញថានៅសមុទ្រខ្មៅ នៅក្នុងទឹកដីតំបន់គ្រីម៉េ និង​កន្លែងផ្សេងទៀត យើងនឹងទៅដល់អ្នកចូលឈ្លានពាន។

អ៊ុយក្រែន និយាយថា កងកម្លាំង​របស់​ខ្លួន​បាន​បំផ្លាញ​ទូក​ដែល​ចូល​ចត​របស់​កង​ទ័ព​ជើង​ទឹក​រុស្ស៊ី​នៅ​តំបន់​គ្រីម៉េ ដែលរុស្ស៊ីបានដាក់បញ្ចូលជាឧបសម្ព័ន្ធដោយឯកតោភាគីកាលពីឆ្នាំ ២០១៤៕