នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាន​និយាយ​កាល​ពីថ្ងៃអាទិត្យ (១២ វិច្ឆិកា) ថា អ៊ីស្រាអែលបានផ្តល់ប្រេងឥន្ធនៈដល់មន្ទីរពេទ្យ អាល់ស៊ីហ្វា (Al Shifa) នៃតំបន់ហ្កាហ្សា ដែលបានផ្អាកប្រតិបត្តិការបន្ទាប់ពីអស់ប្រេងឥន្ធនៈ ប៉ុន្តែ​ក្រុមសកម្មប្រយុទ្ធមួយនេះបានបដិសេធមិនទទួលយកនោះទេ។

យោធា​អ៊ីស្រាអែលបាននិយាយថា ខ្លួនបានត្រៀម​រួចជា​ស្រេច​ក្នុង​ការ​ជម្លៀស​ទា​រក​ចេញ​ពី​មន្ទីរ​ពេទ្យ អាល់ស៊ីហ្វា កាលពីថ្ងៃអាទិត្យ ប៉ុន្តែក្រុមមន្ត្រីប៉ាឡេស្ទីនបាននិយាយថា មនុស្ស​ជា​ច្រើន​នៅ​ខាង​ក្នុង​នៅតែជាប់គាំង ដោយទារកទើបនឹងកើត ៣នាក់បានស្លាប់ និងទារករាប់​សិប​នាក់​ទៀត​កំពុង​ប្រឈម​នឹងហានិភ័យដោយសារការដាច់ចរន្តអគ្គិសនី ខណៈការប្រយុទ្ធ​គ្នាកំពុ​ង​ផ្ទុះ​ឡើង​នៅ​ក្បែរ​នោះ។​

សារព័ត៌មាន NBC បានសាកសួរលោកនាយករដ្ឋមន្រ្តី ណេតាន់យ៉ាហ៊ូ ថាតើអ៊ីស្រាអែល​មាន​គម្រោង​យក​ប្រេងឥន្ធនៈចូលក្នុងតំបន់ហ្កាហ្សា ដើម្បីផ្តល់ថាមពលដល់មន្ទីរពេទ្យ ដែរឬទេ លោក​នាយក​រដ្ឋមន្រ្តីរូបនោះបាននិយាយថា៖ «យើងទើបតែធ្វើសំណើផ្តល់ប្រេងដល់មន្ទីរពេទ្យ ស៊ីហ្វា ប៉ុន្តែ​ពួកគេបានបដិសេធ»។

ក្រុមហាម៉ាស បានបដិសេធការចោទប្រកាន់របស់អ៊ីស្រាអែល ដែលថា​ខ្លួន​មាន​ប៉ុស្តិ៍​បញ្ជាការ​នៅ​ក្រោម មន្ទីរពេទ្យ ស៊ីហ្វា និងមន្ទីរពេទ្យនៅតំបន់ហ្កាហ្សា ផ្សេងទៀត។ ក្រុមសកម្មប្រយុទ្ធមួយនេះ មិន​ទាន់មានការអត្ថាធិប្បាយភ្លាមៗចំពោះការលើកឡើងរបស់លោក ណេតាន់យ៉ាហ៊ូ ជុំវិញ​ការ​ផ្ដល់​ប្រេង​ឥន្ធនៈនេះនោះទេ៕