ក្រុមហាម៉ាសបានទាមទារឲ្យមានវិធានការបន្ថែមទៀតពីបណ្តាប្រទេសអារ៉ាប់ និងមូស្លីម កាលពីថ្ងៃអាទិត្យ (ទី១២ វិច្ឆិកា) ជុំវិញប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា បន្ទាប់ពីមានកិច្ចប្រជុំកំពូលរួមវិសាមញ្ញអ៊ីស្លាម-អារ៉ាប់ នៅទីក្រុងរីយ៉ាដ ប្រទេសអារ៉ាប់ប៊ីសាអ៊ូឌីត។

នៅឯសន្និសីទសារព័ត៌មាន នារដ្ឋធានីបេរូតរបស់ប្រទេសលីបង់ តំណាងឲ្យក្រុមហាម៉ាស លោក Osama Hamdan បាននិយាយថា លោកបានស្វាគមន៍ចំពោះពាក្យសម្ដីរបស់មេដឹកនាំដែលបានចូលរួមកិច្ចប្រជុំនេះ ប៉ុន្តែថា ជំនួបកំពូលនេះមិនបាននាំឲ្យមាននូវយន្តការដ៏មានប្រសិទ្ធភាព និងវិធានការភ្លាមៗ ដើម្បីបញ្ឈប់ជម្លោះនោះទេ។

អារ៉ាប៊ីសាអូឌីតបានព្យាយាមដាក់សម្ពាធលើសហរដ្ឋអាមេរិក និងអ៊ីស្រាអែល ដើម្បីឲ្យបញ្ចប់អរិភាព នៅតំបន់ហ្កាហ្សា ហើយព្រះអង្គម្ចាស់ Mohammed bin Salman ដែលជាអ្នកគ្រប់គ្រងជាក់ស្តែងរបស់ព្រះរាជាណាចក្រនេះ បានប្រមូលផ្តុំបណ្ដាមេដឹកនាំអារ៉ាប់ និងមូស្លីម ដើម្បីពង្រឹងសារនោះ។ សេចក្តីថ្លែងការណ៍ផ្លូវការចុងក្រោយ បានជំរុញឲ្យតុលាការឧក្រិដ្ឋកម្មអន្តរជាតិស៊ើបអង្កេតនូវ «ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលអ៊ីស្រាអែលកំពុងប្រព្រឹត្ត នៅក្នុងដែនដីប៉ាឡេស្ទីន។

គួរបញ្ជាក់ថា មន្ទីរពេទ្យធំៗចំនួន២ នៅភាគខាងជើងតំបន់ហ្កាហ្សា បានបិទទ្វារមិនទទួលអ្នកជំងឺថ្មី កាលពីថ្ងៃអាទិត្យ ដោយបុគ្គលិកបាននិយាយថា ការទម្លាក់គ្រាប់បែករបស់អ៊ីស្រាអែល និងការខ្វះខាតប្រេងឥន្ធនៈ និងថ្នាំ មានន័យថា អ្នកដែលកំពុងទទួលការព្យាបាលរួចហើយ អាចស្លាប់បាន។ ហើយលោក Hamdan បានហៅស្ថានភាពនៅមន្ទីរពេទ្យថា «ជាអំពើសម្លាប់រង្គាល» ហើយបាននិយាយថា ការទទួលខុសត្រូវ នឹងក្លាយទៅជារឿងកុហក ដោយមិនមានអ្នកណាម្នាក់និយាយ ឬចាត់វិធានការប្រឆាំងនឹងអំពើនេះ៕