យោធាអ៊ីស្រាអែលបានចែករំលែកវីដេអូ និងរូបថតកាលពីថ្ងៃចន្ទ ១៣ វិច្ឆិកា ដែល​បង្ហាញ​ពី​អ្វី​ដែល​ខ្លួន​និយាយថា​ជា​អាវុធ​ដែល​ក្រុម​ហាម៉ាស​រក្សា​ទុក​នៅ​ក្នុង​បន្ទប់​ក្រោម​ដី​នៃ​មន្ទីរពេទ្យ​កុមារ​ក្នុង​តំបន់​ហ្កាហ្សា ជាទីដែលខ្លួនបាននិយាយថា ចំណាប់ថ្នូរទំនងជាត្រូវបានឃុំខ្លួននៅទីនោះ។

អ្នក​នាំពាក្យយោធាឧត្តមនាវីទោ ដានីញែល ហាហ្ការី (Daniel Hagari) បាននិយាយថា កង​ទ័ព​បាន​រក​ឃើញមជ្ឈមណ្ឌលបញ្ជាមួយដែលមានគ្រឿងសព្វាវុធ រួមមានគ្រាប់បែកដៃ អាវកាក់​បំផ្ទុះ​គ្រាប់​បែក​អត្តឃាត និងគ្រឿងផ្ទុះផ្សេងទៀតដែលស្តុកទុកដោយក្រុមសកម្មប្រយុទ្ធហាម៉ាស នៅ​ក្នុង​បន្ទប់ក្រោមដីនៃមន្ទីរពេទ្យរ៉ានទីស៊ី (Rantissi) ជា​មន្ទីរពេទ្យកុមារ​ដែល​មាន​ឯក​ទេស​ព្យាបាល​អ្នកជំងឺមហារីក។  

លោកបានបង្ហាញវីដេអូនូវអ្វីដែលមើលទៅដូចជាកន្លែងរស់នៅជាមូលដ្ឋាន រួមទាំងផ្ទះបាយ​តូច​មួយ​ ក៏ដូចជាផ្លូវរូងក្រោមដីនៅក្បែរនោះ ដែលលោកបាននិយាយថា ឆ្ពោះ​ទៅ​ដល់​ផ្ទះ​របស់​មេទ័ព​ជើង​ទឹក​ជាន់ខ្ពស់ក្រុមហាម៉ាស។

សារព័ត៌មាន Reuters មិនអាចផ្ទៀងផ្ទាត់ដោយឯករាជ្យចំពោះទីតាំង ឬកាលបរិច្ឆេទ​ដែល​វីដេអូ​នេះ​ត្រូវ​បាន​ថតនោះទេ។ 

ក្រុមហាម៉ាស និងអាជ្ញាធរមន្ទីរពេទ្យនៅតំបន់ហ្កាហ្សាបានបដិសេធថាមូលដ្ឋានសុខភាព មិនត្រូវបាន​ប្រើប្រាស់តាមរបៀបនេះទេ។ មិនមានការអត្ថាធិប្បាយភ្លាមៗពីក្រុមហាម៉ាស លើ​សេចក្តី​ថ្លែងការណ៍ចុងក្រោយរបស់អ៊ីស្រាអែលនោះទេ៕