ប្រធានាធិបតីប្រេស៊ីលលោក Luiz Inacio Lula da Silva កាលពីថ្ងៃចន្ទ (ទី១៣ ខែវិច្ឆិកា) បានស្វាគមន៍ពលរដ្ឋចំនួន ៣២នាក់ ដែលរដ្ឋាភិបាលរបស់លោក បានរៀបចំដោះស្រាយជួយសង្គ្រោះពីតំបន់ហ្កាហ្សាស្ទ្រីប ក្នុងសប្តាហ៍នេះ បន្ទាប់ពីមានការចរចាររយៈពេល ១ខែ ដោយបានទៅទទួលស្វាគមន៍អ្នកទាំងនោះនៅឯមូលដ្ឋានទ័ពអាកាស Brasilia ក្រោយមានជើងហោះហើរជិត ១ថ្ងៃ។

ជនជាតិប្រេស៊ីលទាំងនោះ បានឆ្លងកាត់ព្រំដែន Rafah ដែលជាច្រកចេញចូលរវាងតំបន់ហ្កាហ្សា និងប្រទេសអេហ្ស៊ីប កាលពីថ្ងៃអាទិត្យចុងសប្ដាហ័កន្លងមក ហើយត្រូវបាននាំទៅកាន់ទីក្រុងគែរ ជាកន្លែងដែលនៅពេលព្រឹកពួកគេបានឡើងជិះយន្តហោះ Embraer របស់ប្រធានាធិបតី ដែលលោក Lula បានពឹងពាក់ ហើយធ្វើដំណើរទៅប្រេស៊ីលឆ្លងកាត់ទីក្រុង Las Palmas ប្រទេសអេស្ប៉ាញ។

លោក Lula បានស្វាគមន៍អ្នកដំណើរទាំងនោះ ដោយការឱប និងថើប បន្ទាប់ពីពួកគេបានទៅដល់កាលពីល្ងាចថ្ងៃចន្ទ ហើយជាមួយគ្នានេះ លោកបានផ្តល់ការគាំទ្រដល់ប្រជាជនប្រេស៊ីល ដែលនៅតែធ្វើដំណើរចូលទៅ ឬមកពីតំបន់ហ្កាហ្សាស្ទ្រីប ព្រមទាំងបានថ្កោលទោសការសម្លាប់ជនស៊ីវិល នៅតំបន់ហ្កាហ្សានេះ។ លោក Lula បាននិយាយក្នុងសុន្ទរកថាខ្លីមួយថា៖ «ខ្ញុំមិនដែលឃើញអំពើហិង្សាដ៏ឃោរឃៅ និងអមនុស្សធម៌លើប្រជាជនស្លូតត្រង់បែបនេះទាល់តែសោះ»។

សូមបញ្ជាក់ថា តំបន់ហ្កាហ្សាស្ទ្រីបបានស្ថិតនៅក្រោមការទម្លាក់គ្រាប់បែកដោយអ៊ីស្រាអែល ដែលមានគោលបំណងបំផ្លាញក្រុមសកម្មប្រយុទ្ធហាម៉ាស ដែលគ្រប់គ្រងតំបន់នេះ និងដែលបានវាយប្រហារអ៊ីស្រាអែលពីតំបន់ហ្កាហ្សា កាលពីថ្ងៃទី៧ ខែតុលា ដោយបានសម្លាប់មនុស្សប្រហែល ១.២០០នាក់។ ហើយចំណែកខាងអាជ្ញាធរសុខាភិបាលរបស់តំបន់ហ្កាហ្សាវិញ ប្រាប់ថា មនុស្សជាង ១១.០០០នាក់ នៅទីនោះ ត្រូវបានបញ្ជាក់ថា ស្លាប់ ដោយប្រហែល ៤០ភាគរយ ជាកុមារ៕