មន្ទីរបញ្ចកោណ និងបណ្ដាមន្ត្រីរបស់សហរដ្ឋអាមេរិក និយាយថា យន្តហោះចម្បាំងអាមេរិក បានធ្វើការវាយប្រហារតាមអាកាសលើទីតាំងនានា ក្នុងប្រទេសស៊ីរី ដែលការវាយប្រហារនេះត្រូវបានរៀបចំឡើងដោយបញ្ជាការកណ្តាលសហរដ្ឋអាមេរិក (CENTCOM) នៅឯមូលដ្ឋានទ័ពអាកាស MacDill និងទទួលបានការអនុញ្ញាតពីប្រធានាធិបតីលោក Joe Biden។

ឧត្តមសេនីយ៍ចូលនិវត្តន៍ លោក Frank McKenzie ដែលជាអតីតប្រធាន CENTCOM និយាយថា ការវាយប្រហារតាមអាកាស ដែលត្រូវបានធ្វើឡើង គឺដើម្បីផ្ញើសារច្បាស់ៗទៅកាន់អ៊ីរ៉ង់។

លោក McKenzie បាននិយាយថា ក្រុមធ្វើសង្គ្រាមតំណាងឲ្យអ៊ីរ៉ង់ កំពុងធ្វើការវាយប្រហារលើកងកម្លាំងសហរដ្ឋអាមេរិក នៅក្នុងតំបន់ ដែលជាផ្នែកនៃបេសកកម្មកាន់តែទូលំទូលាយ ដែលដឹកនាំដោយអ៊ីរ៉ង់។ លោក McKenzie បានបន្តថា ការវាយប្រហារពីក្រុមគាំទ្រដោយអ៊ីរ៉ង់ ត្រូវបានរៀបចំឡើង ដើម្បីបង្ខំឲ្យកងកម្លាំងសហរដ្ឋអាមេរិកចេញពីតំបន់ ហើយលោកបានបញ្ជាក់បន្ថែមថា សហរដ្ឋអាមេរិកនៅទីនោះ ដើម្បីជួយគាំទ្រដល់អ៊ីស្រាអែល ក្នុងគោលបំណងកុំឲ្យជម្លោះនៅតំបន់ហ្កាហ្សា ត្រូវបានចូលរួមដោយប្រទេសដទៃ ដែលចង់បំផ្លាញអ៊ីស្រាអែល។

ហើយបើទោះបីជាជម្លោះនៅក្នុងតំបន់ មានភាពស្មុគស្មាញទៅៗ ដោយសារហេតុផលជាច្រើនក៏ដោយ ក៏លោក McKenzie និយាយថា អ៊ីស្រាអែលត្រូវតែផ្តោតលើបេសកកម្មចម្បងរបស់ខ្លួន៕