ទីក្រុងញ៉ូវដែលី ត្រូវបានគ្របដណ្ដប់ដោយស្រទាប់ផ្សែងអ័ព្ទដ៏ក្រាស់នៅថ្ងៃពុធ ទី ១៥ ខែវិច្ឆិកានេះ ខណៈ សន្ទស្សន៍គុណភាពខ្យល់ (AQI) នៅតែស្ថិតក្នុងចំណុច «គ្រោះថ្នាក់» បន្ទាប់ពីបានធូរស្រាលមួយរយៈពេលខ្លីដោយមានភ្លៀងធ្លាក់កាលពីសប្តាហ៍មុន។

រដ្ឋធានីប្រទេសឥណ្ឌា បានឈរនៅលើកំពូលតារាងជាថ្មីម្តងទៀត ក្នុងចំណោមទីក្រុងដែលមានកង្វក់ខ្យល់ខ្លាំងបំផុតរបស់ពិភពលោក ចងក្រងដោយក្រុម IQAir របស់ប្រទេសស្វីស ដែលបានដាក់សន្ទស្សន៍គុណភាពខ្យល់(AQI) នៅទីក្រុងញ៉ូវដេលី ក្នុងកម្រិត៦៤០ ជាកម្រិត«គ្រោះថ្នាក់» កាលពីដើមខែនេះ ដោយទីក្រុងឡាហ័រប្រទេសប៉ាគីស្ថាន ឈរនៅលំដាប់បន្ទាប់មានសន្ទស្សន៍ ៣៣៥ ។

ពលរដ្ឋចំនួន ២០ លាននាក់ក្នុងទីក្រុង New Delhi ភាគច្រើនបានត្អូញត្អែរពីការរលាកភ្នែក និងរមាស់បំពង់ក ។

គុណភាពខ្យល់នៅភាគខាងជើងប្រទេសឥណ្ឌា កាន់តែធ្លាក់ចុះធ្ងន់ធ្ងរជារៀងរាល់ឆ្នាំមុនរដូវរងា នៅពេលដែលខ្យល់ត្រជាក់ រារាំងសារធាតុបំពុលចេញពីយានយន្ត ឧស្សាហកម្ម ធូលីសំណង់ និងការដុតសំណល់កសិកម្ម។

ទន្ទឹមនឹងនេះ ទន្លេ Yamuna ដែលជាប្រភពទឹកដ៏សំខាន់របស់ទីក្រុង មានស្រទាប់ក្រាស់នៃសារធាតុពុល អណ្តែតលើផ្ទៃទឹក ខណៈ អ្នកគោរពបូជាបានធ្វើពិធីសាសនានៅក្នុងទឹកកខ្វក់នេះ។