ភ្នំពេញ៖ ក្នុងពេលរាជរដ្ឋាភិបាលខិតខំប្រយុទ្ធប្រឆាំងការឆ្លងរាលដាលជំងឺកូវីដក្នុងសហគមន៍ អាជ្ញាធរពាក់ព័ន្ធនៃខេត្តចំនួន៣ដែលមានព្រំប្រទល់ជាមួយប្រទេសថៃបង្កើនការពង្រឹងទប់ស្កាត់ការនាំចូលជំងឺកូវីដ១៩ពីប្រទេសថៃ ក្រោយពីកម្ពុជារកឃើញពលករ៣នាក់បានឆ្លងមេរោគកូវីដ១៩បម្លែងថ្មីក្រោយត្រឡប់មកពីប្រទេសថៃ។
ស្របពេលដែលព្រឹត្តិការណ៍សហគមន៍២០កុម្ភះនៅមិនទាន់មានការថមថយ ហើយតាមបណ្តាខេត្តនីមួយៗដែលមានការរកឃើញអ្នកឆ្លងជំងឺកូវីដជាបន្តបន្ទាប់ និងកំពុងមាញឹកដើម្បីទប់ស្កាត់ការឆ្លងរាលក្នុងសហគមន៍មូលដ្ឋាន។
អាជ្ញាធរជំនាញ និងកងទ័ពនៃបណ្តាខេត្តដែលមានព្រំប្រទល់ជាប់នឹងប្រទេសថៃសង្កេតឃើញថា រួមមានខេត្តបាត់ដំបង ខេត្តបន្ទាយមានជ័យ និងខេត្តឧត្តរមានជ័យ តាមរយៈសេចក្តីសម្រេចរបស់រាជរដ្ឋាភិបាល ដើម្បីប្រយុទ្ធប្រឆាំងនឹងជំងឺរាតត្បាតជាសកល អាជ្ញាធរតាមបណ្តាទាំងនេះ កំពុងអនុវត្តនៃការមិនអនុញ្ញាតរាល់អ្នកដំណើរជាតិ និងអន្តរជាតិឆ្លងដែនចេញ-ចូល តាមច្រកព្រំដែនអន្តរជាតិ ច្រកទ្វេភាគី និងច្រកផ្លូវការ ឬមិនផ្លូវការទាំងអស់ ដោយលើកលែងតែការធ្វើចរាចរណ៍បម្រើវិស័យដឹកជញ្ជូនតែប៉ុណ្ណោះ ប៉ុន្តែក៏មានករណីលើកលែងចាំបាច់ឆ្លងដែនមួយចំនួន ក្រោមការអនុវត្តតាមការណែនាំរបស់រាជរដ្ឋាភិបាល ក្នុងគោលបំណងធានានូវចរន្តនៃសេដ្ឋកិច្ចជាតិរបស់កម្ពុជា។
អំឡុងអនុវត្តទៅតាមសេចក្តីសម្រេច របស់រាជរដ្ឋាភិបាលជុំវិញការប្រយុទ្ធប្រឆាំងជំងឺកូវដី១៩ តាមបណ្តាច្រកព្រំដែនទាំងអស់ជាមួយប្រទេសថៃ ដែលអូសបន្លាយរយៈពេលជាង១ឆ្នាំកន្លងមកហើយ ដោយសារការរាតត្បាតជាសកល ពិសេសអត្រានៃការឆ្លងរបស់ប្រទេសជិតខាងមានការកើនឡើង។ តែទោះបីជាយ៉ាងណា តាមរយៈក្រុមការងាររបស់ទូរទស្សន៍ BTV បានចុះទៅខេត្តបណ្តាខេត្តដែលមានព្រំប្រទល់ជាប់ជាមួយប្រទេសថៃស្ថានភាពដែលកំពុងមានឥតឈប់ឈរ គឺវិស័យពាណិជ្ជកម្ម ជាការដឹកជញ្ជូន ទំនិញទូទៅពីកម្ពុជាទៅថៃនិងពីចូលថៃចូលកម្ពុជា។ ប៉ុន្តែទោះក្នុងស្ថានភាពនៃបរិបទឆ្លងរាលជំងឺកូវីដ១៩ អាជ្ញាធរតាមបណ្តាច្រកព្រំដែនអន្តរជាតិទាំងអស់គោរពតាមវិធានការសុខាភិបាល ដើម្បីធានាឲ្យលំហូរនៃការចរាចរណ៍ដឹកជញ្ជូនមិនឲ្យមានការរាំងស្ទះ ស្របពេលកម្ពុជាកំពុងប្រយុទ្ធប្រឆាំងនឹងជំងឺកូវីដ១៩។
ជាមួយគ្នានេះ ក្រោយពីក្រសួងសុខាភិបាលប្រកាសអំពីការរកឃើញពលករ៣នាក់មកពីប្រទេសបានឆ្លងមេរោគកូវីដ១៩បម្លែងថ្មី B.1.617 ដែលជាប្រភេទឆ្លងរាលដាលខ្លាំងក្នុងបណ្តាប្រទេសចំនួន៧ នៅតំបន់អាស៊ាន អាជ្ញាធរនៃបណ្តាខេត្តជាប់ប្រទេសថៃចាប់ផ្តើមបង្កើនការប្រុងប្រយ័ត្នខ្ពស់ជាងមុន តាមរយៈពង្រឹងយ៉ាងម៉ឺងម៉ាត់រាល់ការឆ្លងដែនខុសច្បាប់ដែលបង្កជាហានិភ័យទៅក្នុងសហគមន៍ ដោយកងទ័ពចំណុះភូមិភាគនីមួយៗត្រូវបានពង្រាយតាមបន្ទាត់ព្រំដែន ឬជិតច្រកព្រំដែននានា ខណៈក្នុងពេលបច្ចុប្បន្នពលកររាប់ពាន់បន្តត្រឡប់ពីប្រទេសថៃចូលកម្ពុជា។ បើតាមការបញ្ជាក់របស់ឯកឧត្តម ប៉ែន កុសល្យ អភិបាលខេត្តឧត្តរមានជ័យ និងឯកឧត្តម ងួន រតនៈ អភិបាលខេត្តបាត់ដំបង បានលើកឡើង នូវវិធានការរៀបចំធ្វើតេស្តរហ័សលើពលករដែលមកពីប្រទេសថៃ ដើម្បីឲ្យដំណើរការរៀបចំអ្នកវិជ្ជមាន កូវីដ១៩ និងអ្នកសង្ស័ទៅតាមបច្ចេកទេសសុខាភិបាល។
ពាក់ព័ន្ធនឹងការវិលត្រឡប់របស់ពលករខ្មែរទាំងអស់មកពីប្រទេសថៃ អាជ្ញាធរពាក់ព័ន្ធតាមបណ្តាច្រកព្រំដែនបានរៀបចំការអនុវត្តវិធានការសុខាភិបាល ដោយពិនិត្យសុខភាព ដើម្បីរៀបចំដឹកជញ្ជូនទៅធ្វើចត្តាឡីស័កតាមការរៀបចំរបស់អាជ្ញាមូលដ្ឋាននៅស្រុកកំណើត ក្នុងករណីសង្ស័យជាអាការៈនៃមេរោគកូវីដ-១៩ មន្ត្រីសុខាភិបាលនឹងធ្វើតេស្តរហ័សភ្លាមៗនៅប៉ុស្តិ៍សុខភាព ដើម្បីសំដៅប្រយុទ្ធប្រឆាំងនឹងជំងឺកូវីដ១៩នាំចូលពីក្រៅប្រទេស ពិសេសគឺគិតគូរការព្យាបាលបងប្អូនពលករទាំងអស់ដោយឥតគិតថ្លៃ ដែលជាការយកចិត្តទុកដាក់ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
