កោះកុង៖ ខេត្តកោះកុង កំពុងទទួលរងនូវឥទ្ធិពលពីខ្យល់មូសុងនិរតីខ្លាំង និងប្រព័ន្ធសម្ពាធទាប ដែលបង្កការរំខានមួយចំនួនដល់ការស់រនៅប្រកបអាជីវកម្មផ្សេងៗ ព្រោះតែបរិមាណទឹកភ្លៀងច្រើនលើសលុប។
រយៈពេល ២ថ្ងៃមកហើយ ដែលខេត្តកោះកុង ជាពិសេសក្រុងខេមរភូមិន្ទ បានជួបគ្រោះធម្មជាតិបណ្តាលមកពីព្យុះភ្លៀង ខ្យល់កន្ក្រាក់ ផ្គររន្ទះ និងមានទឹករលកខ្ពស់ៗតាមតំបន់ឆ្នេរសមុទ្រ ដូចតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម។
ជាក់ស្តែង នៅថ្ងៃទី១០ ខែមិថុនា ឆ្នាំ២០២១នេះ ព្យុះភ្លៀងក្នុងបរិមាណច្រើន បង្កឱ្យផ្ទះសម្បែងប្រជាពលរដ្ឋ និងដងផ្លូវមួយចំនួនក្រុងខេមរភូមិន្ទ កំពុងរងការជន់លិចជាបន្តបន្ទាប់ ខណៈមកទល់ម៉ោងនេះនៅមិនទាន់រាំងនៅឡើយទេ។ រីឯប្រជានេសាទក៏បានចតក្បែរច្រាំងពុំហ៊ានចេញទូកទៅសមុទ្រដែរ។
លោក ឈឹម ចិន អភិបាលរងក្រុងខេមរភូមិន្ទ ឱ្យដឹងថា មុនរដូវវស្សាចូលមកដល់ អាជ្ញាធរពាក់ព័ន្ធបានជីកស្តារប្រព័ន្ធប្រឡាយលូរំដោះទឹកស្អុយស្ទើរគ្រប់គោលដៅរួចរាល់ហើយ។ ការដែលមានទឹកលិចផ្លូវ និងផ្ទះពលរដ្ឋមួយចំនួនយ៉ាងដូច្នេះ ព្រោះតែទំហំបរិមាណទឹកភ្លៀងច្រើនលើសលុបពេកបង្កទឹកហូរចូលប្រព័ន្ធលូមិនទាន់។
លោកអភិបាលរងក្រុងខេមរភូមិន្ទ ទទួលស្គាល់ដែរថា ប្រព័ន្ធរំដោះទឹកក្នុងទីក្រុងទំហំតូចពុំអាចដោះស្រាយចរន្តទឹកហូរបានលឿននោះទេ ករណីបើភ្លៀងរាំងបាន៣ម៉ោង គឺជំនន់ទឹកភ្លៀងនេះនឹងស្រកអស់វិញហើយ។ លោកក៏ណែនាំដល់មេភូមិចៅសង្កាត់ តាមដានពិនិត្យទីតាំងដែលជន់លិច ឬមានសំរាមបាំងមុខទឹក ត្រូវកាយស្តារជាបន្ទាន់ផងដែរ។
គួរបញ្ជាក់ថា ទាក់ទិននឹងកាបម្រែបម្រួលអាកាសធាតុនេះដែរ នៅខាងស្រុកកោះកុង ក៏រងផលប៉ះពាល់ផងដែរ ដូចជា៖ ផ្លូវថ្នល់ និងបង្គោលភ្លើងអគ្គិសនី តាមបណ្តោយផ្លូវជាតិលេខ៤៨ នៅភូមិសាស្ត្រឃុំតាតៃក្រោម និងផ្លូវកៅស៊ូ១ខ្សែតភ្ជាប់ពីផ្លូវជាតិលេខ៤៨ឆ្ពោះទៅឃុំជ្រោយប្រស់ ស្រុកកោះកុង កំពុងរងការខូចខាតយ៉ាងដំណំ ព្រោះតែកម្លាំងទឹកហូរបុកផ្តាច់ ខណៈព្យុះភ្លៀងបន្តបោកបក់ឥតឈប់ឈរ។
នេះបើតាមការផ្តល់ព័ត៌មានបឋមរបស់លោក សុខ ភិរម្យ អភិបាលរងស្រុកកោះកុង នៅរសៀលថ្ងៃទី១០ ខែមិថុនា ឆ្នាំ២០២១៕ អត្ថបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
