រុស្ស៊ី ៖ កាសែត Financial Times រាយការណ៍នៅថ្ងៃពុធនេះថា ដោយលើកប្រភពគ្មានអត្តសញ្ញាណចំនួន ៣ថា ដាណឺម៉ាកនឹងមានភារកិច្ចត្រួតពិនិត្យ និងរារាំងនាវាដឹកប្រេងរុស្ស៊ី ឆ្លងកាត់ដែនទឹករបស់ពួកគេ ក្រោមផែនការថ្មីរបស់សហភាពអឺរ៉ុប ។ 

នៅពេលសួរពីសេចក្តីរាយការណ៍របស់កាសែត Financial Times អ្នកនាំពាក្យវិមានក្រឹមឡាំងលោក Dmitry Peskov បាននិយាយថា លោកពុំមានព័ត៌មានដែលមានសេចក្តីរាយការណ៍បែបនេះឡើយ ប៉ុន្តែលោកបានព្រមានថា ច្បាប់ដឹកជញ្ជូន ត្រូវតែអនុវត្តតាម ។ 

លោក Peskov និយាយប្រាប់ក្រុមអ្នកសារព័ត៌មានថា អ្នករាល់គ្នាគួរតែប្រុងប្រយ័ត្នជាមុនពីតម្រូវការអនុវត្តន៍តាមច្បាប់ដឹកជញ្ជូនពាណិជ្ជកម្មអន្តរជាតិទាំងអស់ ។ 

រុស្ស៊ីបញ្ជូនប្រហែល ១ភាគ៣នៃការនាំចេញប្រេងតាមសមុទ្ររបស់ខ្លួន ឬស្មើនឹង ១,៥ភាគរយនៃការផ្គត់ផ្គង់សកល ឆ្លងកាត់ច្រកសមុទ្រដាណឺម៉ាក ហេតុដូច្នេះហើយការព្យាយាមបញ្ឈប់ការផ្គត់ផ្គង់ទាំងនោះ នឹងធ្វើឲ្យតម្លៃប្រេងហក់ឡើងខ្ពស់ជាងមុន ហើយនិងការប្រឈមជាមួយរុស្ស៊ី ។ 

កាសែត Financial Times បានរាយការណ៍ថា ដាណឺម៉ាក នឹងមានគោលដៅលើនាវាដឹកប្រេងរុស្ស៊ី ដែលគ្មានប័ណ្ណធានាលោកខាងលិច គឺជាជំហានមួយធ្វើឲ្យប៉ះពាល់យ៉ាងខ្លាំងដល់ប្រាក់ចំណូលពីការនាំចេញប្រេងរុស្ស៊ី ខណៈដែលវាធ្វើឲ្យស្ទះការផលិតប្រេង និងវិស័យធុរកិច្ចចម្រាញ់ប្រេងទាំងមូលរបស់រុស្ស៊ី ។ 

ចាប់តាំងពីរុស្ស៊ី បានបញ្ជូនទាហានចូលទៅក្នុងប្រទេសអ៊ុយក្រែនកាលពីខែកុម្ភៈ ឆ្នាំ ២០២២មក លោកខាងលិច បានព្យាយាមបំផ្លិចបំផ្លាញសេដ្ឋកិច្ចរុស្ស៊ី ប៉ុន្តែរុស្ស៊ីដែលជាប្រទេសនាំចេញប្រេងធំបំផុតលំដាប់ទី ២របស់ពិភពលោក នៅតែបន្តលក់ប្រេងរបស់ខ្លួនបានដដែល ដល់ទីផ្សារពិភពលោក ដោយប្រើប្រាស់នាវាដឹកប្រេងដែលមានមូលដ្ឋាន និងមានការធានានៅក្រៅលោកខាងលិច ៕