ស្ទឹងត្រែង៖ អាជ្ញាធរខេត្តស្ទឹងត្រែង បាននាំយកស្បៀងអាហារនិងសម្ភារៈ សម្រាប់ប្រើប្រាស់ការពារជំងឺឆ្លងកូវីដ-១៩ ជូនដល់អាជ្ញាធរខេត្តចំប៉ាសាក់ប្រទេសឡាវ។
នៅថ្ងៃទី០៩ ខែមិថុនា ឆ្នាំ២០២១ម្សិលមិញនេះ ឯកឧត្តម ម៉ុម សារឿន អភិបាលខេត្តបានដឹកនាំគណៈប្រតិភូរបស់ខេត្តស្ទឹងត្រែង បាននាំយកស្បៀងអាហារ និង សម្ភារៈឧបត្ថម្ភបម្រើឲ្យការងារទប់ស្កាត់ការឆ្លងរាលដាលជំងឺ កូវីដ-១៩ ផ្ដល់ ជូនដល់រដ្ឋបាលខេត្តចាំប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ នៅចំណុចច្រកទ្វារអន្តរជាតិ ត្រពាំងក្រៀល។
ក្នុងឱកាសប្រគល់អំណោយខាងលើនេះផងដែរ ឯកឧត្ដម ម៉ុម សារឿន បានសម្ដែងការពេញចិត្តចំពោះទំនាក់ទំនងមិត្តភាពជាប្រពៃណីដ៏ល្អ និងកិច្ចសហប្រតិបត្តិការ ដល់យូរអង្វែង រវាង ប្រទេសកម្ពុជា នឹង ប្រទេសឡាវ ក៏ដូចជាខេត្តស្ទឹងត្រែង និង ខេត្តចំប៉ាសាក់ ដែលរក្សាបាននូវចំណងមិត្តភាព សាមគ្គីភាព ទ្វេភាគីរួមគ្នាយ៉ាងល្អប្រសើរ និងការតភ្ជាប់រវាងប្រទេសទាំងពីរ ដែលត្រូវបានកសាងឡើង តាមរយៈមូលដ្ឋានទំនុកចិត្តដ៏រឹងមាំ ការយោគយល់គ្នា សាមគ្គីភាព និងភាពជាអ្នកជិតខាងល្អ។
ឯកឧត្តម អភិបាលខេត្តស្ទឹងត្រែង បានបញ្ជាក់នូវការប្ដេជ្ញាចិត្ត ធ្វើការយ៉ាងជិតស្និទ្ធជាមួយគ្នា ក្នុងការពង្រីកបន្ថែមទៀតនូវទំនាក់ទំនងទ្វេភាគី និងកិច្ចសហប្រតិបត្តិការលើគ្រប់វិស័យ ដើម្បីជាប្រយោជន៍រួមសម្រាប់ប្រជាជាតិ និងប្រជាជនទាំងពីរ ពិសេស មិត្តភាព រវាងខេត្តស្ទឹងត្រែង និង ខេត្តចំប៉ាសាក់ ផងដែរ។
ឯកឧត្តម បណ្ឌិត វិល័យវង្ស ប៊ុតដាខាំ អភិបាលខេត្តចំប៉ាសាក់ បានសម្តែងការថ្លែងអំណរអរគុណ យ៉ាងជ្រាលជ្រៅ ចំពោះ ឯកឧត្តម ម៉ុម សារឿន អភិបាលខេត្តស្ទឹងត្រែង ក៏ដូចរដ្ឋបាលខេត្តស្ទឹងត្រែង ដែលបានផ្តល់ជូនអំណោយជាស្បៀងអាហារ និង សម្ភារៈឧបត្ថ បម្រើឲ្យការងារទប់ស្កាត់ការឆ្លងរាលដាលជំងឺ កូវីដ-១៩ និងការសម្រាកព្យាបាលរបស់អ្នកជំងឺកូវីដ មកដល់ខេត្តចំប៉ាសាក់។
ឯកឧត្តម បានបញ្ជាក់បន្ថែមថា៖ កន្លងរាជរដ្ឋាភិបាលកម្ពុជា បានផ្តល់ជូនអំណោយ ជាគ្រឿងបរិក្ខារពេទ្យ នឹង ម៉ាស់ ជាច្រើន រាជរដ្ឋាភិបាលឡាវ ក៏ដូច នាពេលនេះដែលរដ្ឋបាលខេត្តស្ទឹងត្រែង បានផ្តល់ អំណោយ ជាស្បៀងអាហារ និង សម្ភារៈឧបត្ថ បម្រើឲ្យការងារទប់ស្កាត់ការឆ្លងរាលដាលជំងឺ កូវីដ_១៩ និងការសម្រាកព្យាបាលរបស់អ្នកជម្ងឺកូវីដ មករដ្ឋបាលខេត្តចំប៉ាសាក់។ ក្នុងនោះដែរ ឯកឧត្តម បញ្ជាក់បន្ថែមថា៖ នេះជាសកម្មភាពមួយដល់ល្អ រវាង ខេត្តទាំងពីរ ក្នុងការចូលរួម រក្សាឲ្យបាននូវចំណងមិត្តភាព សាមគ្គីភាព ដ៏យូរអង្វែង មួយនេះ ឲ្យនៅស្ថិតស្ថេរ ទៅមុនបន្តទៀត។
សូមបញ្ជាក់ថា អំណោយដែលរដ្ឋបាលខេត្តស្ទឹងត្រែង ផ្តល់ជូនរដ្ឋបាលខេត្ត ចំប៉ាសាក់ រួមមាន៖ អង្គរ ចំនួន ៥.០០០ គីឡូក្រាម ( ៥ តោន ) . ត្រីខកំប៉ុង ចំនួន ៣.០០០កំប៉ុង ( ៣០ កេស ) . មី ចំនួន ៩.០០០កញ្ចប់ ( ៣០០កេស ) . ម៉ាស់ពេទ្យ ចំនួន ៣០.០០០ ម៉ាស់ ( ៣០ កេស ) .ទឹកអាល់កុល ចំនួន ៣០០ ដប ( ១៥ កេស ) . ទឹកខ្ពុលមាត់ ចំនួន ១.០០០ ដប ( ៥០ កេស )៕ អត្ថបទ៖ មាស ផល្លា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
