ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់ទៅថៅកែ និងអ្នកគ្រប់គ្រងរោងចក្រ-សហគ្រាសទាំងអស់នៅរាជធានីភ្នំពេញ ឱ្យផ្ដល់ព័ត៌មានអំពីទីកន្លែងស្នាក់នៅបច្ចុប្បន្នរបស់ក្រុមកម្មករពួកគេ ដោយថា ជាការបំពេញទៅតាមតម្រូវការចាំបាច់របស់សាលារាជធានីភ្នំពេញ។
ក្នុងសេចក្ដីជូនដំណឹងនៅថ្ងៃនេះ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឯកឧត្ដម អ៊ិត សំហេង បានស្នើទៅម្ចាស់ ឬនាយកគ្រប់គ្រងរោងចក្រ សហគ្រាស និងកម្មករនិយោជិតទាំងអស់ ឱ្យផ្ដល់ព័ត៌មានអំពីទីកន្លែងស្នាក់នៅបច្ចុប្បន្នរបស់ពួកគេទៅអាជ្ញាធរមានសមត្ថកិច្ចនៅក្នុងរាជធានីភ្នំពេញ។
ក្រសួងការងារ និងបណ្ដុះបណ្ដាលវិជ្ជាជីវៈ បញ្ជាក់ថា ការធ្វើបច្ចុប្បន្នភាពទីកន្លែងស្នាក់នៅបច្ចុប្បន្នរបស់កម្មករ និងនិយោជិតនេះ គឺត្រូវធ្វើឡើងតាមតម្រូវការចាំបាច់របស់រដ្ឋបាលរាជធានីភ្នំពេញ។
ក្រសួងការងារ និងបណ្ដុះបណ្ដាលវិជ្ជាជីវៈ បានសេចក្ដីណែនាំបែបនេះ បន្ទាប់ពីសាលារាជធានីភ្នំពេញ ចាប់ផ្ដើមស្វែងរកដំណោះស្រាយសម្រាប់គ្រប់គ្រងការឆ្លងរីករាលដាលនៃមេរោគកូវីដ-១៩នៅក្នុងចំណោមកម្មករកម្មការិនី និងនិយោជិតនៅតាមរោងចក្រ និងសហគ្រាសនានានៅក្នុងរាជធានីភ្នពេញ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
