ភ្នំពេញ ៖ នៅក្នុងកិច្ចប្រជុំក្រៅផ្លូវការនៃរដ្ឋមន្រ្តីក្រសួងការពារជាតិអាស៊ាន-អាមេរិក ដែលបានធ្វើឡើងនៅទីក្រុងហ្សាកាតា ប្រទេស ឥណ្ឌូនេស៊ី នាថ្ងៃទី១៥ ខែវិច្ឆិកា ឆ្នាំ២០២៣នេះនាយឧត្តមសេនីយ៍ ទៀ សីហា ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិកម្ពុជា បានថ្លែងកោតសរសើរ និងវាយតម្លៃខ្ពស់ចំពោះទំនាក់ទំនងរវាងអាស៊ាន និង អាំមេរិក ដែលបានបន្តប្ដេជ្ញារក្សាសន្តិភាព សន្តិសុខ និងស្ថិរភាព ក៏ដូចជាវិបុលភាពសម្រាប់តំបន់នៃភាគីទាំងពីរ។

នៅក្នុងបទអន្តរាគមន៍ នៃកិច្ចប្រជុំខាងលើនេះនាយឧត្តមសេនីយ៍ ទៀ សីហា បានបញ្ជាក់ថាចាប់តាំងពីការបង្កើតឡើងក្នុងឆ្នាំ១៩៧៧ភាពជាដៃគូអាស៊ាន-អាមេរិក បានបន្តប្ដេជ្ញារក្សាសន្តិភាព សន្តិសុខ និងស្ថិរភាព ក៏ដូចជាវិបុលភាពរួមគ្នា។ កិច្ចព្រមព្រៀងរវាងមេដឹកនាំអាស៊ាន-អាមេរិកក្នុងការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ(CSP) ហើយនៅក្នុងកិច្ចប្រជុំកំពូលអាស៊ាន-អាមេរិកលើកទី១០នៅរាជធានីភ្នំពេញ ក៏បានឆ្លុះបញ្ចាំងពីភាពទូលំទូលាយ និងស៊ីជម្រៅនៃទំនាក់ទំនងរបស់ភាគីទាំងពីរ និងបានបើកផ្លូវសម្រាប់ការពង្រឹងកិច្ចសហប្រតិបត្តិការលើវិស័យការពារជាតិបន្ថែមទៀត។

នៅក្នុងប្រជុំនេះដែរ នាយឧត្តមសេនីយ៍ ទៀ សីហា បានកោតសរសើរដល់តួនាទីស្ថាបនារបស់សហរដ្ឋអាមេរិកក្នុងតំបន់ ហើយសហរដ្ឋអាមេរិក, តែងតែជាដៃគូដ៏ជិតស្និទ្ធរបស់អាស៊ាន ស្របពេលដែលអាស៊ាន និងអាមេរិកកំពុងពង្រឹងទំនាក់ទំនងឱ្យកាន់តែជិតស្និទ្ធ និងស៊ីជម្រៅ ក្នុងគោលបំណងចង់បន្តធ្វើការជាមួយគ្នាប្រកបដោយការជឿទុកចិត្តគ្នា គោរពគ្នា ការយោគយល់គ្នា និងគោរពផលប្រយោជន៍គ្នាទៅវិញទៅមក ដើម្បីសម្រេចបាននូវតំបន់ដែលទទួលបាននូវសន្តិភាព វិបុលភាព និងសន្តិសុខយូរអង្វែងជាដើម។

ថ្លែងនៅក្នុងកិច្ចប្រជុំនោះដែរ លោកឡយដ៍ អូស្ទីន(Loyd Austin) រដ្ឋមន្ត្រីការពារជាតិសហរដ្ឋអាមេរិកបានលើកឡើងថា សហរដ្ឋអាមេរិកបានប្តេជ្ញាចិត្តយ៉ាងជ្រាលជ្រៅចំពោះសន្តិភាព និង វិបុលភាព នៅអាស៊ីអាគ្មេយ៍ ដើម្បីពង្រឹងភាពជាដៃគូរនៅទីនេះ ហើយថាអាស៊ានមានសារៈសំខាន់សម្រាប់កិច្ចសន្ទនា និង សហប្រតិបត្តិការក្នុងតំបន់ នេះជាមូលហេតុដែលធ្វើឲ្យសហរដ្ឋអាមេរិក ធ្វើការងារអោយកាន់តែស៊ីជំរៅជាមួយអាស៊ាននៅគ្រប់កំរិត ។

បើតាមលោក ប្រាបូវូ ស៊ូប៊ីនតូ រដ្ឋមន្រ្តីការពារជាតិឥណ្ឌូនេស៊ី បានសម្តែងការកោតសរសើរដល់សហរដ្ឋអាមេរិកដែលបានធ្វើការជាមួយប្រទេសនៅក្នុងតំបន់ ដើម្បីសន្តិភាព និង ស្ថេរភាព។លោកបន្តថាកិច្ចប្រជុំនាពេលនេះ និងធ្វើជាសក្ខីភាពចំពោះអាស៊ាន និង សហរដ្ឋអាមេរិក និងភាពជាដៃគូរ ដោយផ្អែកទៅលើការគោរពគ្នាទៅវិញទៅមក ផលប្រយោជន៍រួម ការយោគយល់គ្នា សន្តិភាព ស្ថេរភាព នៅក្នុងតំបន់ឥណ្ឌូប៉ាស៊ីហ្វិច៕ អត្ថបទ ៖ បាន ចក់