ភ្នំពេញ ៖ ក្រុមហ៊ុនផ្សារមូលបត្រកម្ពុជា (CSX) នៅថ្ងៃទី១៦ ខែវិច្ឆិកា ឆ្នាំ២០២៣នេះ បានសម្ពោធដាក់ឲ្យប្រើប្រាស់ជាផ្លូវការនូវប្រព័ន្ធបើកគណនីជួញដូរតាមអនឡាញ ដើម្បីបង្កើនភាពងាយស្រួលដល់វិនិយោគិនក្នុងការប្រើប្រាស់ និងជួញដូរភាគហ៊ុន។

 ប្រព័ន្ធបើកគណនីជួញដូរតាមអនឡាញនេះ ជាប្រព័ន្ធអនុញ្ញាតឱ្យវិនិយោគិនទទួលបានគណនីភ្លាមៗរៀងរាល់ម៉ោងធ្វើការ ដើម្បីបើកគណនីជួញដូរតាមអនឡាញបាន វិនិយោគិនត្រូវដោនឡូតកម្មវិធីទូរស័ព្ទផ្សារហ៊ុន និងតម្រូវឲ្យវិនិយោគិនចុចពាក្យ បើកគណនីជួញដូរ បន្ទាប់មកត្រូវជ្រើសរើសក្រុមហ៊ុនមូលបត្រ ដែលខ្លួនពេញចិត្តហើយបំពេញព័ត៌មានមួយចំនួន ស្តេនអត្តសញ្ញាញប័ណ្ណ និងស្កេនមុខ។

 បើតាមឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានមានប្រសាសន៍ថា បន្ទាប់ពីក្រុមហ៊ុនមូលបត្រ បានពិនិត្យមើលព័ត៌មានរបស់អ្នកស្នើសុំរួចរាល់ នោះលេខអត្តសញ្ញាញវិនិយោគិន និងលេខគណនីជួញដូរនឹងត្រូវបង្កើតឡើងភ្លាមៗ។ ឯកឧត្តមបានបន្តថា តាមប្រព័ន្ធបើកគណនីជួញដូរតាមអនឡាញ វិនិយោគិនកាន់តែមានភាពងាយស្រួល ឆាប់រហ័ស ចំណេញពេលវេលា និងការចំណាយផ្សេងៗ ដើម្បីទទួលបានគណនីជួញដូរ។ បន្ទាប់ពីបានគណនីជួញដូរ វិនិយោគិនអាចដាក់ប្រាក់ចូលគណនី និងជួញដូរបានភ្លាមៗផងដែរ។

​នៅក្នុងពិធីបើកពិព័រណ៍ផ្សារភាគហ៊ុនកម្ពុជា “My First Stock” នៅព្រឹកថ្ងៃទី១៦ ខែវិច្ឆិកានេះ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា បានចាត់ទុក ការបើកគណនីជួញដូរមូលបត្រតាមអនឡាញនេះថា គឺជាផ្នែកមួយនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលថ្មី ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមនៃកម្ពុជា។ ឯកឧត្តម មានសុទិដ្ឋិនិយមថា តាមរយៈកិច្ចខិតខំប្រឹងប្រែងរបស់គ្រប់តួអង្គពាក់ព័ន្ធក្នុងវិស័យមូលបត្រ នឹងកាន់តែទាក់ទាញក្រុមហ៊ុនបោះផ្សាយ និងវិនិយោគិន ក៏ដូចជាការបង្កើតផលិតផលវិនិយោគផ្សេងៗ និងការរៀបចំយន្តការនានាដើម្បីសម្រួលដល់ដំណើការជួញដូរ។

 សូមបញ្ជាក់ថា គិតមកដល់បច្ចុប្បន្ននេះ ផ្សារមូលបត្រកម្ពុជា មានគណនីជួញដូរចំនួនប្រមាណជាង ៤ម៉ឺន ៤ពាន់គណនី។ ដោយឡែក ទំហំជួញដូរជាមធ្យមប្រចាំថ្ងៃ មានប្រមាណជាង ២០ម៉ឺនដុល្លារក្នុងមួយថ្ងៃ បើគិតពីដើមឆ្នាំ២០២៣មក។ ផ្សារមូលបត្រកម្ពុជា សង្ឃឹមថា នៅឆ្នាំ២០២៤ខាងមុខ នឹងមានការបើកគណនីកើនឡើងដល់ ៥ម៉ឺនគណនីថ្មី ឬស្មើនឹង១០០%នៃចំនួនគណនី ដែលបានបើកជាង១០ឆ្នាំមកនេះ៕ អត្ថបទ ៖ ឈិត បូរ៉ាវី