ការិយាល័យមេធាវីសហរដ្ឋអាមេរិកនៅទីក្រុងញូវយ៉ក បានប្រកាសពីការរឹបអូសទំនិញក្លែងក្លាយធំបំផុតពុំធ្លាប់ដែលមាននៅក្នុងប្រវត្តិសាស្រ្តសហរដ្ឋអាមេរិក ហើយនិងបានចាប់ខ្លួនជនសង្ស័យ ២នាក់ ដែលរងការចោទប្រកាន់ពីបទជួញដូរទំនិញខុសច្បាប់ ។

យោងតាមការអះអាងរបស់លោក Damian Williams គឺជាមេធាវីនៅទីក្រុងញូវយ៉ក បានឲ្យដឹងថា ការិយាល័យស៊ើបអង្កេតសន្តិសុខមាតុភូមិ និងនាយកដ្ឋាននគរបាលក្រុងញូវយ៉ក រឹបអូសបានកាបូបក្លែងក្លាយចំនួន ២១៩.០០០ សម្លៀកបំពាក់ ស្បែកជើង និងផលិតផលប្រណីតដទៃជាច្រើនទៀត ដែលការលក់រាយមានតម្លៃប្រមាណជាង ១ពាន់លានដុល្លារ ។

លោក Adama Sow វ័យ ៣៨ឆ្នាំ មកពីទីក្រុង Queens រដ្ឋញូវយ៉ក និងលោក Abdulai Jalloh វ័យ ៤៨ឆ្នាំ មកពីទីក្រុងញូវយ៉ក រដ្ឋញូវយ៉ក ត្រូវបានចោទប្រកាន់ពីបទជួញដូរទំនិញខុសច្បាប់ ។ ចុងចោទទាំង ២នាក់ ត្រូវបានចាប់ខ្លួនកាលពីព្រឹកថ្ងៃពុធកន្លងទៅ ។

យោងតាមការចោទប្រកាន់បានឲ្យដឹងថា លោក Sow និងលោក Jalloh គ្រប់គ្រងប្រតិបត្តិការជួញដូរទំនិញក្លែងក្លាយខុសច្បាប់ទ្រង់ទ្រាយធំ ចេញពីឃ្លាំងស្តុកទំនិញនៅសង្កាត់ Manhattan ហើយការចោទប្រកាន់នេះ នឹងធ្វើឲ្យពួកគេជាប់ពន្ធនាគាររយៈពេលអតិបរមាចំនួន ១០ឆ្នាំ ៕