ការដឹកជញ្ជូនប្រេងឥន្ធនៈដំបូង បានចូលទៅដល់តំបន់ហ្កាហ្សា ពីប្រទេសអេហ្ស៊ីប កាលពីល្ងាចថ្ងៃសុក្រ ទី១៧ ខែវិច្ឆិកា បន្ទាប់ពីអ៊ីស្រាអែល បានយល់ព្រមលើសំណើរបស់សហរដ្ឋអាមេរិកក្នុងការអនុញ្ញាតឱ្យ ដឹកជញ្ជូនមានកំណត់ ដើម្បីបញ្ចប់ការដាច់បណ្តាញទំនាក់ទំនង ដែលបានផ្អាកក្បួនរថយន្តដឹកជំនួយរយៈពេលពីរថ្ងៃ។ ទីភ្នាក់ងារអង្គការសហប្រជាជាតិ បាននិយាយអំពីស្ថានភាពអស់សង្ឃឹមកាន់តែខ្លាំងឡើង សម្រាប់ពលរដ្ឋប៉ាឡេស្ទីន ២,៤ លាននាក់ ជាប់នៅខាងក្នុងតំបន់ហ៊ុមព័ទ្ធ ដែលអ៊ីស្រាអែលបាននិងកំពុងបាញ់ផ្លោងតាមដីគោក និងតាមអាកាស អស់រយៈពេលប្រាំមួយសប្តាហ៍កន្លងទៅនេះ។ ការដឹកជញ្ចូនប្រេងឥន្ធនៈ បានកើតមានឡើងនៅពេលដែលកងទ័ពបានសម្រុកចូលមន្ទីរពេទ្យធំបំផុតនៅតំបន់ហ្កាហ្សា ក្នុងការស្វែងរកមជ្ឈមណ្ឌលប្រតិបត្តិការរបស់ក្រុមហាម៉ាស ដែលអ៊ីស្រាអែល និយាយថា លាក់ខ្លួននៅក្នុងលេនដ្ឋានខាងក្រោមនោះ។ ទីប្រឹក្សាសន្តិសុខជាតិ លោក Tzachi Hanegbi បាននិយាយថា ជាការឆ្លើយតបទៅនឹងសំណើរបស់សហរដ្ឋអាមេរិក គណៈរដ្ឋមន្ត្រីទទួលបន្ទុកសង្គ្រាមរបស់អ៊ីស្រាអែលបានយល់ព្រមជាឯកច្ឆ័ន្ទក្នុងការផ្តល់រថយន្តដឹកប្រេងចំនួនពីរគ្រឿងក្នុងមួយថ្ងៃ ដើម្បីដំណើរការរោងចក្រប្រព្រឹត្តិកម្មទឹកសំណល់ ដែលកំពុងប្រឈមមុខការដួលរលំដោយសារតែកង្វះអគ្គិសនី។ លោកនិយាយថា យើងបានសម្រេចចិត្តដូចនេះ ដើម្បីការពារការរាលដាលជំងឺរាតត្បាត។ មន្ត្រីជាន់ខ្ពស់អាមេរិកម្នាក់បាននិយាយថា ទីក្រុងវ៉ាស៊ីនតោន បានដាក់សម្ពាធយ៉ាងខ្លាំងលើប្រទេសអ៊ីស្រាអែល អស់រយៈពេលជាច្រើនសប្តាហ៍មកហើយ ដើម្បីអនុញ្ញាតឱ្យប្រេងឥន្ធនៈបានឆ្លងកាត់តំបន់ Rafah ពីប្រទេសអេហ្ស៊ីប ដោយរដ្ឋមន្ត្រីការបរទេសសហរដ្ឋអាមេរិក លោក Antony Blinken បានបញ្ជាក់យ៉ាងច្បាស់ថា អ៊ីស្រាអែលចាំបាច់ត្រូវចាត់វិធានការបន្ទាន់ដើម្បីបញ្ចៀសមហន្តរាយមនុស្សធម៌។ អ៊ីស្រាអែល បានទាមទារម្តងហើយម្តងទៀតនូវការធានាថា រាល់ប្រេងឥន្ធនៈដែលបញ្ជូនទៅកាន់តំបន់ហ្កាហ្សា នឹងមិនត្រូវបានបង្វែរទិសដៅដោយក្រុមហាម៉ាសក្នុងគោលបំណងយោធាឡើយ។ មន្ត្រីអាមេរិក បាននិយាយថា នៅក្រោមកិច្ចព្រមព្រៀងនេះ ប្រេងឥន្ធនៈ ១៤០.០០០លីត្រ នឹងត្រូវបានអនុញ្ញាតរៀងរាល់ ៤៨ ម៉ោងម្តង ដែលក្នុងនោះ ២០.០០០លីត្រ នឹងត្រូវបានផ្តល់ឲ្យសម្រាប់ម៉ាស៊ីនភ្លើងដើម្បីបន្តបណ្តាញទូរស័ព្ទឡើងវិញ។