ក្រចេះ ៖ កញ្ញា រិទ្ធី លំអរពេជ្រ ស្ថាបនិកនៃមហោស្រពសិល្បៈ បុណ្យភូមិ និង ជាអ្នកដឹកនាំការរៀបចំកម្មវិធី បុណ្យភូមិមានជើងក្នុងខេត្តក្រចេះ បានឲ្យដឹងថា បុណ្យភូមិមានជើង គឺជាកម្មវិធីមួយដែលកើតចេញពី មហោស្រពសិល្បៈបុណ្យភូមិ ដែលតែងតែ រៀបចំនៅរាជធានីភ្នំពេញ។ រយ:ពេល១០ឆ្នាំនៃការផ្សព្ធផ្សាយនូវវប្បធម៌  ប្រពៃណី និងសិល្បៈគ្រប់ទម្រង់របស់ខ្មែរ កម្មវិធីនេះ គឺតែងតែទទួលបានការគាំទ្រពីបងប្អូន ប្រជាពលរដ្ឋខ្មែរ។

កញ្ញា បានបញ្ជាក់ថា គោលបំណងនៃការបង្កើត កម្មវិធីបុណ្យភូមិមានជើង នេះឡើង នៅលើទឹកដីនៃខេត្តក្រចេះ គឺចង់ចូលរួមផ្សព្ធផ្សាយពីតំបន់ដែលមានធម្មជាតិ ស្រស់ស្អាត និងសំបូរទៅដោយវប្បធម៌ ដល់ប្រជាជនកម្ពុជា ដែលគាត់មិនដែលបានចាប់ អារម្មណ៍។

ជាក់ស្ដែងនៅក្នុងរយៈពេល បីថ្ងៃនេះ កញ្ញា រិទ្ធី លំអរពេជ្រ បានដឹងនាំ យុវជនស្ម័គ្រចិត្ត «ឡេឡេ ផ្សោត» ប្រមាណជាង ១០០នាក់ ទៅទស្សនាសត្វផ្សោត និងការដាំដើមឈើ ជាច្រើនដើម នៅក្នុងបរិវេណអន្លង់ផ្សោតកាំពី។

កម្មវិធីបុណ្យភូមិមានជើងនេះ ក៏បានជ្រើសយកទីតាំងវត្តរកាកណ្ដាលចាស៎ ដើម្បីមកបើកបង្ហាញ ការសម្ដែងសិល្បៈបែបប្រពៃណី ការទស្សនាផ្សាយចំណេះដឹង ផ្នែកសិល្បៈ ដោយនៅទីនោះ មានផ្ទះសិល្បៈបុរាណផងដែរ។ លើសពីនេះទៅទៀត គឺជាការបង្ហាញស្មារតីសាមគ្គីភាពរួមគ្នា ដោយមានការមើលល្ខោនស្បែកធំ រាំកម្សាន្ដ និងលេងល្បែងប្រជាប្រិយ។

កម្មវិធីដ៏ធំនេះ ប្រព្រឹត្តទៅបានដោយមានកិច្ចសហការរៀបចំដោយយូនីសេហ្វ និងជំនួយអភិវឌ្ឍន៍ប្រទេសអូស្រ្តាលី ខបត្ថម្ភដោយ កម្ពុអ៊ែរ៉ា សហការជាមួយ បារមី គាំទ្រដោយកម្មវិធីមូលនិធិរុងរឿង ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ជាមួយនឹងការសហការរៀបចំពីយុវជនស្ម័គ្រចិត្ត «ឡេឡេ ផ្សោត» ប្រមាណជាង ១០០នាក់។

សូមជម្រាបថា បុណ្យភូមិមានជើង គឺជាកម្មវិធីមួយដែលកើតចេញពី មហោស្រពសិល្បៈ បុណ្យភូមិ ដែលតែងតែ រៀបចំនៅរាជធានីភ្នំពេញ។ រយ:ពេល១០ឆ្នាំ នៃការផ្សព្វផ្សាយនូវវប្បធម៌ប្រពៃណី និងសិល្បៈគ្រប់ទម្រង់របស់ខ្មែរ កម្មវិធីនេះ គឺតែងតែទទួលបានការគាំទ្រពីបងប្អូនប្រជាពលរដ្ឋខ្មែរ ដូច្នេះហើយបុណ្យភូមិមានជើង នឹងបោះជំហានទៅគ្រប់ខេត្តក្រុងរាជធានីនៃព្រះរាជាណាចក្រកម្ពុជា ដោយជំហានដំបូងនេះ បុណ្យភូមិមានជើង បានធ្វើដំណើរមកកាន់ខេត្តក្រចេះ ដែលជាខេត្តដំបូង នៃការរៀបចំកម្មវិធី៕ ដោយ ៖សេង ម័រ