ភ្នំពេញ៖ នៅថ្ងៃនេះ សមាគមគ្រូពេទ្យស្ម័គ្រចិត្តសម្តេចតេជោ (TYDA) ទទួលថវិកាឧបត្ថម្ភឆ្នាំទី២ពីក្រុមហ៊ុន ជីប ម៉ុងគ្រុប ចំនួន២០ម៉ឺនដុល្លារ ដើម្បីគាំទ្រដល់សកម្មភាពមនុស្សធម៌។

នៅថ្ងៃទី២០ ខែវិច្ឆិកា ឆ្នាំ២០២៣ លោកជំទាវបណ្ឌិត ពេជ ចន្ទមុនី្ន អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តសម្តេចតេជោ (TYDA) បានអញ្ជើញក្នុងពិធីប្រគល់ ទទួលថវិកាឧបត្ថម្ភចំនួន២០ម៉ឺនដុល្លារពីក្រុមហ៊ុន ជីប ម៉ុងគ្រុប ដែលតំណាងដោយអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុងគ្រុប។

នាឱកាសនោះ លោកជំទាវបណ្ឌិត ពេជ ចន្ទមុនី្ន បានថ្លែងអំណរគុណដល់ក្រុមហ៊ុន ជីប ម៉ុង ដែលបានចូលរួមចំណែក និងជួយគាំទ្រដល់សមាគមគ្រូពេទ្យស្ម័គ្រចិត្តសម្ដេចតេជោកន្លងមក។ លោកជំទាវបណ្ឌិត មានប្រសាសន៍ទៀតថា សមាគមគ្រូពេទ្យស្ម័គ្រចិត្តសម្ដេចតេជោ បានដំណើរការ១១ ឆ្នាំ គិតត្រឹមដំណាច់ខែធ្នូ ឆ្នាំ២០២៣ ដែលមានសមាជិកសរុបចំនួនជាង៨ពាន់នាក់។ 

លោកជំទាវបណ្ឌិត បញ្ជាក់ថា ក្នុងភារកិច្ចរបស់សមាគមគ្រូពេទ្យស្ម័គ្រចិត្តសម្ដេចតេជោ តែងតែរៀបចំសកម្មភាពកាន់តែច្រើនជាងមុនដោយផ្អែកលើចំនួននៃសមាជិកដែលកើនឡើង ក្នុងគោលដៅប្ដេជ្ញាចិត្តយ៉ាងមុតមាំ ក្នុងកិច្ចការមនុស្សធម៌តែមួយប៉ុណ្ណោះ។

លោកជំទាវបណ្ឌិត បញ្ជាក់ទៀតថា ជាក់ស្ដែងអំឡុងពេលប្រយុទ្ធប្រឆាំងនឹងការឆ្លងរាលដាលជំងឺកូវីដ១៩ សមាគមគ្រូពេទ្យស្ម័គ្រចិត្តសម្តេចតេជោ បានទទួលការគាំទ្រ និងជួយឧបត្ថម្ភដំបូងគេពីក្រុមហ៊ុនជីបម៉ុងគ្រុប ដោយធ្វើការបរិច្ចាគថវិកាផ្ទាល់ខ្លួន ដើម្បីបម្រើទៅដល់តម្រូវការនានា។ លើសពីនេះ ក្រៅពីការរួមចំណែករបស់ក្រុមហ៊ុនជីប ម៉ុងគ្រុប ក៏មានបណ្ដាក្រុមហ៊ុនឯកជនដទៃទៀតបានចូលរួមបរិច្ចាគជួយគាំទ្ររាល់សកម្មភាពរបស់សមាគមក្រុមគ្រូពេទ្យស្ម័គ្រចិត្តសម្ដេចតេជោជានិច្ច។

លោកជំទាវបណ្ឌិត បញ្ជាក់ទៀតថា សមាគមគ្រូពេទ្យស្ម័គ្រចិត្តសម្តេចតេជោ បានប្រមូលនូវធនធានជំនាញក្នុងវិស័យសុខាភិបាល ធ្វើយ៉ាងណាប្រើប្រាស់នូវជំនាញ និងសមត្ថភាពរបស់ក្រុមគ្រូពេទ្យនីមួយៗ ដើម្បីជួយដល់ប្រជាពលរដ្ឋ ជាពិសេសប្រជាពលរដ្ឋខ្វះខាតជាដើម។ សមាគមមានគោលដៅរៀបចំការបណ្តុះបណ្តាលគ្រូពេទ្យស្ម័គ្រចិត្តឲ្យមានជំនាញកាន់តែប្រសើរជាងនេះ ដោយធ្វើការបញ្ជូនទៅសិក្សាជំនាញទាំងនោះនៅក្រៅប្រទេស ដូចជា តៃវ៉ាន់ សធារណរដ្ឋកូរ៉េ និងបារាំង។ 

លោកជំទាវបណ្ឌិត បន្ថែមថា នាដើមខែធ្នូខាងមុខ សមាគមគ្រូពេទ្យស្ម័គ្រចិត្តសម្តេចតេជោ នឹងរៀបចំជាសន្និសីទបង្ហាញពីវិធីព្យាបាល ហៅថា Medical Conference រយៈពេល២ថ្ងៃ ពីថ្ងៃទី២ ដល់ថ្ងៃទី៣ ខែ​ធ្នូ ឆ្នាំ២០២៣ ដើម្បូបណ្តុះបណ្តាល និងបង្ហាញពីវិធីព្យាបាលទៅតាមប្រភេទជំងឺប្រកបដោយជំនាញ និងវិជ្ជាជីវៈ។ 

ជាមួយគ្នា អ្នកឧកញ៉ា លាង ឃុន បានលើកឡើងថា ក្រុមហ៊ុន ជីប ម៉ុងគ្រុប តែងតែចូលរួមចំណែកយ៉ាងសកម្មជាមួយរាជរដ្ឋាភិបាល ក្នុងការអភិវឌ្ឍន៍សង្គមជាតិតាមរយៈសកម្មភាពផ្សេងៗ ជាក់ស្តែងការឧបត្ថម្ភថវិកាជូនសមាគមគ្រូពេទ្យស្ម័គ្រចិត្តសម្តេចតេជោនៅថ្ងៃនេះជាសកម្មភាពមួយដែលមិនអាចខ្វះបាន ដើម្បីការងារមនុស្សធម៌ជូនប្រជាពលរដ្ឋ៕ ដោយ ៖ ឧត្ដម