អ្នកនាំពាក្យក្រសួងការបរទេស Nasser Kanani បាននិយាយក្នុងសន្និសីទសារព័ត៌មានមួយនៅថ្ងៃចន្ទនេះថា ប្រទេសអ៊ីរ៉ង់ បានបដិសេធការអះអាងរបស់អ៊ីស្រាអែលថា ខ្លួនមិនបានជាប់ពាក់ព័ន្ធក្នុងការចាប់នាវា ដឹកទំនិញដែលគ្រប់គ្រងដោយអង់គ្លេស និងជប៉ុននៅសមុទ្រក្រហមភាគខាងត្បូងដោយក្រុមឧទ្ទាមរបស់នៅប្រទេសយេម៉ែន។ 

លោក Kanaani បានថ្លែងថា៖«យើងបាននិយាយជាច្រើនដងថា ក្រុមតស៊ូនៅក្នុងតំបន់ធ្វើសកម្មភាពដោយឯករាជ្យ និងដោយស្ម័គ្រចិត្ត ដោយផ្អែកលើផលប្រយោជន៍របស់ពួកគេ និងប្រជាជនរបស់ពួកគេ ដោយបន្ថែមថា ការអះអាងរបស់អ៊ីស្រាអែល គឺសំដៅបង្វែរការយកចិត្តទុកដាក់ចេញពី«ការបរាជ័យដែលមិនអាចប្រកែកបាន»របស់អ៊ីស្រាអែល នៅក្នុងសមរភូមិប្រឆាំងនឹងក្រុមសកម្មប្រយុទ្ធហាម៉ាស នៅតំបន់ហ្កាហ្សា។

កាលពីថ្ងៃអាទិត្យ អ៊ីស្រាអែល បាននិយាយថា ឧបទ្ទវហេតុនេះ គឺជាអំពើភេរវកម្មរបស់អ៊ីរ៉ង់ ដែលមានផលវិបាកសម្រាប់សន្តិសុខដែនសមុទ្រអន្តរជាតិ។

ក្រុមហ៊ូធីដែលជាសម្ព័ន្ធមិត្តរបស់ទីក្រុងតេអេរ៉ង់ បាននិងកំពុងបាញ់មីស៊ីលរយៈចម្ងាយឆ្ងាយ និងយាន    ដ្រូន នៅអ៊ីស្រាអែល ក្នុងសាមគ្គីភាពជាមួយក្រុមសកម្មប្រយុទ្ធហាម៉ាសប៉ាឡេស្ទីន ដែលកំពុងប្រយុទ្ធនៅតំបន់ហ្កាហ្សា។