រដ្ឋមន្ត្រីការពារជាតិអាមេរិក លោក Lloyd Austin បានទៅដល់ទីក្រុងទីក្រុងក្នុងពេលសង្រ្គាម នៅថ្ងៃចន្ទ នេះ ក្នុងកាយវិការនៃការគាំទ្រ «មិនរាថយ» នៅពេលដែលសំណួរ ត្រូវបានឡើងអំពីនិរន្តរភាពនៃជំនួយលោកខាងលិចដ៏សំខាន់ ខណៈដែលសង្រ្គាមជាមួយរុស្ស៊ី កំពុងអូសបន្លាយ។

លោកAustin ដែលអមដោយមេបញ្ជាការបញ្ជាការដ្ឋានអឺរ៉ុបរបស់សហរដ្ឋអាមេរិក ត្រូវបានបង្ហាញនៅបន្ទាប់រថភ្លើង ដោយចាប់ដៃជាមួយឯកអគ្គរដ្ឋទូតសហរដ្ឋអាមេរិកប្រចាំទីក្រុងគីវ នៅក្នុងរូបថតមួយសន្លឹក ដែលចុះផ្សាយដោយស្ថានទូត។

លោក Austin បានសរសេរនៅលើវេទិកាប្រព័ន្ធផ្សព្វផ្សាយសង្គម X ថា៖«ខ្ញុំមកទីនេះនៅថ្ងៃនេះ ដើម្បីថ្លែងសារដ៏សំខាន់មួយ សហរដ្ឋអាមេរិកនឹងបន្តឈរជាមួយអ៊ុយក្រែនក្នុងការប្រយុទ្ធ ដើម្បីសេរីភាពរបស់ពួកគេប្រឆាំងនឹងការឈ្លានពានរបស់រុស្ស៊ី ទាំងឥឡូវនេះ និងទៅអនាគត»។

ឯកអគ្គរដ្ឋទូតសហរដ្ឋអាមេរិកប្រចាំនៅទីក្រុងគីវ លោកស្រី Bridget Brink បាននិយាយថា ដំណើរទស្សនកិច្ចនេះបានបង្ហាញពី«ការគាំទ្រឥតងាករេរបស់ទីក្រុងវ៉ាស៊ីនតោនចំពោះអ៊ុយក្រែន ក្នុងការប្រយុទ្ធ ដើម្បីសេរីភាពរបស់ខ្លួន» ។

ដំណើរទស្សនកិច្ចនេះ ធ្វើឡើង ចំពេលមានការបែកបាក់គ្នាកាន់តែខ្លាំងលើជំនួយសម្រាប់អ៊ុយក្រែនក្នុងសភាអាមេរិកជាមួយនឹងការបោះឆ្នោតប្រធានាធិបតីអាមេរិក នៅខែវិច្ឆិកា ឆ្នាំក្រោយ។ សន្និសីទឧស្សាហកម្មយោធារួមអ៊ុយក្រែន-អាមេរិក នៅក្រុងវ៉ាស៊ីនតោន គ្រោងធ្វើនៅខែក្រោយ។