បណ្ដាអ្នកចូលរួម កាលពីថ្ងៃអាទិត្យ (ទី១៩ ខែវិច្ឆិកា) បានឲ្យដឹងថា ជុំទី៣ នៃកិច្ចពិភាក្សារបស់អង្គការសហប្រជាជាតិ ឬ UN ក្នុងការប្រឹងប្រែងឲ្យបានចេញនូវសន្ធិសញ្ញាដំបូងរបស់ពិភពលោក ដែលគ្រប់គ្រងការបំពុលដោយប្លាស្ទិក ទទួលបានសំណើជាង ៥០០ ពីអ្នកដែលពាក់ព័ន្ធ។

បណ្ដាគណៈប្រតិភូ ដែលបានចំណាយពេល ១សប្តាហ៍ជួបប្រជុំគ្នា នៅរដ្ឋធានីរបស់ប្រទេសកេនយ៉ា ក្នុងកិច្ចពិភាក្សាដែលគេស្គាល់ថា INC3 មានរហូតដល់ដំណាច់ឆ្នាំក្រោយ ដើម្បីឲ្យបានឈានដល់កិច្ចព្រមព្រៀងមួយ សម្រាប់ការគ្រប់គ្រងប្លាស្ទិក ដែលផលិតកាកសំណល់ប្រហែល ៤០០លានតោនរៀងរាល់ឆ្នាំ។

ឧស្សាហកម្មប្លាស្ទិក ប្រទេសនាំចេញប្រេង និងគីមីឥន្ធនៈ ក្នុងនោះរួមទាំងរុស្ស៊ី និងអារ៉ាប៊ីសាអ៊ូឌីតផងដែរ បាននិយាយថា កិច្ចព្រមព្រៀងសកលមួយ គួរតែលើកកម្ពស់ការកែច្នៃ និងការប្រើប្រាស់ឡើងវិញនូវប្លាស្ទិក ប៉ុន្តែអ្នកធ្វើយុទ្ធនាការបរិស្ថាន និងរដ្ឋាភិបាលមួយចំនួននិយាយថា ត្រូវឲ្យមានការផលិតតិចជាងមុន តាំងពីដំបូង។

ក្រុមបរិស្ថាន Greenpeace បាននិយាយថា កិច្ចព្រមព្រៀងដ៏ជោគជ័យមួយ នឹងតម្រូវឲ្យសហរដ្ឋអាមេរិក និងសហភាពអឺរ៉ុប បង្ហាញពីភាពជាអ្នកដឹកនាំឲ្យបានខ្លាំងជាង ដែលពួកគេមានកន្លងមក។ ការពិភាក្សា ២ជុំទៀត នឹងធ្វើឡើងនៅឆ្នាំក្រោយ ដើម្បីព្យាយាមបញ្ចប់កិច្ចព្រមព្រៀង៕