ប្រធានាធិបតីអាមេរិក លោក ចូ បៃដិន (Joe Biden) បាននិយាយកាលពីថ្ងៃច័ន្ទ (២០ វិច្ឆិកា) ថា លោកជឿជាក់ថា កិច្ចព្រមព្រៀងដោះលែងចំណាប់ថ្នូរ ដែលត្រូវបានចាប់ខ្លួនក្រុមហាម៉ាស នៅ​តំបន់​ហ្កាហ្សា គឺជិតឈានដល់ហើយ ដោយលោក​បាន​ប្រាប់​អ្នក​សារព័ត៌មាន​បែប​នេះ​ពេល​ត្រូវ​បាន​សាក​សួរនៅសេតវិមានអំពីលទ្ធភាព នៃកិច្ចព្រមព្រៀងចំណាប់ថ្នូរ។

សារព័ត៌មានរ៉យទ័រ បានរាយការណ៍​កាល​ពី​សប្តាហ៍​មុន​ដោយ​ដក​ស្រង់​សម្តី​ក្រុម​មន្ត្រី​ជុំវិញ​កិច្ច​ពិភាក្សា​នេះ​ថា ក្រុមអ្នកសម្រុះសម្រួលជនជាតិកាតា បាននឹងកំពុង​ព្យាយាម​ឲ្យ​មាន​កិច្ច​ព្រម​ព្រៀង​រវាង​អ៊ីស្រាអែល និងក្រុមហាម៉ាស ដើម្បីផ្លាស់ប្តូរចំណាប់ថ្នូរចំនួន ៥០នាក់ ជាថ្នូរនឹង​បទ​ឈប់​បាញ់​រយៈពេល ៣ថ្ងៃ ដែលនឹងជួយជំរុញការដឹក​ជញ្ជូន​ជំនួយ​សង្គ្រោះ​បន្ទាន់​ដល់​ជន​ស៊ីវិល​នៅ​តំបន់​ហ្កាហ្សា។

ចំណាប់ថ្នូរប្រហែល ២៤០ នាក់ ត្រូវបាន​ចាប់​ខ្លួន​ក្នុង​អំឡុង​ពេល​ការ​វាយ​ឆ្មក់​ឆ្លង​ព្រំដែន​ដ៏​បង្ហូរ​ឈាម​របស់​ក្រុមហាម៉ាស ចូលទៅក្នុងប្រទេសអ៊ីស្រាអែល កាលពីថ្ងៃទី ៧ ខែតុលា ដែលបាន​ជំរុ​ញ​ឱ្យអ៊ីស្រាអែល វាយប្រហារ​ទឹក​ដីប៉ាឡេស្ទីន​ដ៏តូច​មួយ​នេះ​​ដើម្បីក​ម្ចាត់​ក្រុម​សកម្ម​ប្រយុទ្ធ​អ៊ីស្លាម​មួយ​នេះចោ​ល។

ទោះបីជា​មានការប្រយុទ្ធគ្នាជាបន្តបន្ទាប់ក៏ដោយ ឯកអគ្គរដ្ឋ​ទូត​អ៊ីស្រាអែល​ប្រចាំ​នៅ​សហរដ្ឋ​អាមេរិក​ លោក Michael Herzog បានប្រាប់សារព័ត៌មាន ABC កាលពីថ្ងៃអាទិត្យថា អ៊ីស្រាអែល សង្ឃឹម​ថា ចំណាប់ថ្នូរជាច្រើនអាចត្រូវបានដោះលែងដោយក្រុមហាម៉ាស «ក្នុងរយៈពេល​ប៉ុន្មាន​ថ្ងៃ​ខាង​មុខ​នេះ»៕