ភ្នំពេញ៖ ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា នៅថ្ងៃទី២១វិច្ឆិកានេះ បានអញ្ជើញ​ចូល​រួម​ក្នុង​ព្រឹត្តិការណ៍​ប្រកួត​សិស្ស​ឆ្នើម​ទូទាំង​ប្រទេស​៖​ ការ​សិក្សា​ដោយ​ការ​បង្កើតវត្ថុគម្រូ «បំណងប្រាថ្នា» វគ្គពាក់កណ្តាលផ្តាច់ មានចំនួនជាង៦០ក្រុម។ ព្រឹត្តិការណ៍នេះ រៀបចំឡើងនៅអាគារ CKCC នៃសាកលវិទ្យាល័យភូមិន្ទភ្នំពេញ។

នៅក្នុងឱកាសនោះ ឯកឧត្តមបណ្ឌិត សាន វឌ្ឍនា បានថ្លែងថា ព្រឹត្តិការណ៍បំណងប្រាថ្នា គឺ​ជា​ការ​ចូលរួមលើកកម្ពស់ការអប់រំវិទ្យាសាស្រ្ត និងបច្ចេកវិទ្យា (STEM) និងប្រមូល​ផ្តុំ​សិស្សានុសិស្ស​ដែល​មាន​សក្តានុពល​ក្នុងស្រាវជ្រាវ គំនិតច្នៃប្រឌិត និងនវានុវត្តន៍ ដោយផ្សាភ្ជាប់​ជាមួយ​បរិបទ​នៃ​ការ​អប់រំ​ឌីជីថល​។​ ព្រឹត្តិការណ៍​នេះ​ក៏​បាន​រួម​ចំណែក​ជំរុញ​ក្តី​ស្រមៃ​របស់​សិស្សានុ​សិស្ស​ឱ្យ​ក្លាយ​ជា​ការ​ពិត តាមរយៈការផ្តល់គ្រូបង្គោលណែនាំពីគំរូបង្កើតថ្មី និងឧបត្ថម្ភ​ថវិកា​បន្ថែម​ដើម្បីជា​ជំនួយ​ក្នុង​ផលិត​វត្ថុ​គំរូ​ទៅតាមគម្រោង និងបំណងប្រាថ្នារបស់ពួកគេ។ ក្រៅពីនេះ ឯកឧត្តមបណ្ឌិត​បាន​លើក​ទឹក​ចិត្តដល់អាណាព្យាបាលគាំទ្រគំនិតច្នៃប្រឌិតថ្មីៗរបស់កូនៗ ហើយកូនៗក៏​ត្រូវ​ខិតខំ​ប្រឹងប្រែង​ផងដែរ។

សិស្សានុសិស្សបានបង្ហាញក្តីរំភើបរីករាយ និងរំពឹងថា គំរូដែលចង់បង្កើតថ្មីៗនោះ នឹង​ទទួល​បាន​ការ​គាំទ្រ​ពី​ក្រសួងអប់រំយុវជន និងកីឡា។

តាមការគ្រោងទុក ព្រឹត្តិការណ៍ប្រកួតសិស្សឆ្នើមទូទាំងប្រទេស៖ការសិក្សាដោយការបង្កើតវត្ថុគម្រូ «បំណងប្រាថ្នា» លើកទី២ ឆ្នាំ២០២៣ នឹងត្រូវបញ្ចប់ក្នុងអំឡុងខែមករា ឆ្នាំ២០២៤។ ក្រោយ​បញ្ចប់​សិស្សានុសិស្ស​ដែលបានចូលរួមក្នុងព្រឹត្តិការណ៍នេះ នឹងទទួលបានវិញ្ញាបនបត្រ​បញ្ជាក់​ការ​ចូលរួម​ដោយ​មាន​មេដាយ ថវិកា និងរង្វាន់មួយចំនួនទៀតជាដើម៕ អត្ថបទ៖ទូច សោភ័ណ