កងទ័ពអ៊ីស្រាអែល នៅថ្ងៃអង្គារ (ទី២១ ខែវិច្ឆិកា) បានចេញផ្សាយរូបភាពវីដេអូ ដែលបង្ហាញពីកងកម្លាំងរុលទៅមុខបន្ថែមទៀត ក្នុងតំបន់ហ្កាហ្សាស្ទ្រីប ដោយក្នុងនោះរួមទាំងអ្វី ដែលកងទ័ពបាននិយាយថា ជាមីស៊ីលប្រឆាំងរថក្រោះ ដែលត្រូវបានរកឃើញនៅក្រោមគ្រែទារក ក្នុងផ្ទះរបស់ជនជាតិប៉ាឡេស្ទីន ក្នុងដែនដីដែលគ្រប់គ្រងដោយក្រុមហាម៉ាស។

សារព័ត៌មាន Reuters មិនអាចផ្ទៀងផ្ទាត់ដោយឯករាជ្យពីទីតាំងនៃវីដេអូនោះដោយភាគច្រើន ឬកាលបរិច្ឆេទ ដែលវីដេអូទាំងអស់ ត្រូវបានថតនោះទេ។ ក្នុងខណៈពេលដែលរថក្រោះ និងកងទាហានបន្តប្រយុទ្ធជាមួយពួកសកម្មប្រយុទ្ធ នៅតំបន់ឆ្នេរ ប្រមុខក្រុមហាម៉ាស បាននិយាយថា ក្រុមសកម្មប្រយុទ្ធប៉ាឡេស្ទីន ជិតឈានដល់កិច្ចព្រមព្រៀងបទឈប់បាញ់ជាមួយអ៊ីស្រាអែលហើយ បើទោះបីជាការវាយប្រហារដ៏រន្ធាន់លើតំបន់ហ្កាហ្សា នៅតែបន្តមាន ហើយគ្រាប់រ៉ុក្កែត ត្រូវបានបាញ់ចូលដែនដីអ៊ីស្រាអែលក៏ដោយ។

សូមបញ្ជាក់ថា ក្រុមហាម៉ាសបានចាប់ចំណាប់ថ្នូរប្រហែល ២៤០នាក់ អំឡុងការវាយលុកយ៉ាងកំរោល កាលពីថ្ងៃទី៧ ខែតុលា ក្នុងដែនដីអ៊ីស្រាអែល ដោយបានសម្លាប់មនុស្ស ១.២០០នាក់ ដែលភាគច្រើនជាជនស៊ីវិល។ ការវាយឆ្មក់នោះដែលជាថ្ងៃសម្លាប់មនុស្សច្រើនបំផុតក្នុងប្រវត្តិសាស្ត្រ ៧៥ឆ្នាំរបស់អ៊ីស្រាអែល បានជំរុញឲ្យអ៊ីស្រាអែលវាយលុកតំបន់ហ្គាហ្សា ដើម្បីកម្ទេចក្រុមសកម្មប្រយុទ្ធ ដែលបានគ្រប់គ្រងទីនោះ តាំងពីឆ្នាំ២០០៧ មក។ 

ចាប់តាំងពីពេលនោះមក រដ្ឋាភិបាលដែលគ្រប់គ្រងដោយក្រុមហាម៉ាសរបស់ហ្កាហ្សា បាននិយាយថា យ៉ាងហោចណាស់មានប្រជាជនប៉ាឡេស្ទីន ១៣.៣០០នាក់ ត្រូវបានគេបញ្ជាក់ថា ត្រូវបានសម្លាប់ ក្នុងនោះមានកុមារយ៉ាងហោចណាស់ ៥.៦០០នាក់៕