ការបំផ្លិចបំផ្លាញអាចមើលឃើញនៅក្នុងជំរំជនភៀសខ្លួន Jabalia ស្ថិតនៅតំបន់ភាគខាងជើងហ្គាហ្សានាថ្ងៃអង្គារនេះ បន្ទាប់ពីការវាយប្រហារតាមច្រកអាកាសរបស់អ៊ីស្រាអែល ។ 

មនុស្សបានរកមើលក្រោមគំនរបាក់បែក និងកម្ទេចកម្ទីនៃអគារផ្ទះរងការបំផ្លិចបំផ្លាញ ខណៈដែលមនុស្សផ្សេងទៀត សែងអ្នករងរបួសទៅកាន់មន្ទីរពេទ្យ ។ 

នៅក្នុងមន្ទីរពេទ្យ Kamal Edwan ស្ថិតនៅតំបន់ភាគខាងជើងហ្គាហ្សា មនុស្សជាច្រើនបានរងរបួស និងទារកតក់ស្លុត កុមារ និងមនុស្សពេញវ័យ ជួបជុំគ្នាដើម្បីរកការព្យាបាល ។ 

ក្រុមហាម៉ាស់ បានវាយឆ្មក់តំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ដែលជាថ្ងៃស្លាប់មនុស្សច្រើនបំផុតនៅក្នុងប្រវត្តិសាស្រ្តរយៈពេល ៧៥ឆ្នាំរបស់អ៊ីស្រាអែល បង្ខំឲ្យអ៊ីស្រាអែលបើកការវាយលើតំបន់ហ្គាហ្សាដែលក្រុមជីវពលអ៊ីស្លាមមួយនេះគ្រប់គ្រងចាប់តាំងពីឆ្នាំ ២០០៧រហូតមក ។ 

ចាប់តាំងពីពេលនោះមក ជនប៉ាឡេស្ទីនយ៉ាងហោច ១៣.៣០០នាក់ ត្រូវបានប្រកាសថាបានស្លាប់ ក្នុងនោះរួមមានទាំងកុមារយ៉ាងហោច ៥.៦០០នាក់ ដោយសារការទម្លាក់គ្រាប់បែករបស់អ៊ីស្រាអែល បានធ្វើឲ្យតំបន់ភាគច្រើនជាពិសេសនៅពាក់កណ្តាលភាគខាងជើង រាបដល់ដី ។ 

ដោយឡែក ២ភាគ៣នៃពលរដ្ឋ ២,៣លាននាក់នៅតំបន់ហ្គាហ្សា គ្មានផ្ទះសម្បែងរស់នៅ មនុស្សរាប់ពាន់នាក់ នៅបន្តធ្វើដំណើរដោយថ្មើរជើងជារៀងរាល់ថ្ងៃទៅកាន់តំបន់ភាគខាងត្បូង ជាមួយនឹងទ្រព្យសម្បត្តិ និងកូនៗរបស់ពួកគេនៅលើដៃ ៕