ទីភ្នាក់ងារសារព័ត៌មានរដ្ឋលីបង់ បានរាយការណ៍ថា អ្នកសារព័ត៌មាន ២នាក់ ដែលធ្វើការឲ្យប៉ុស្តិ៍ទូរទស្សន៍ ដែលមានមូលដ្ឋាននៅលីបង់ និងមនុស្សម្នាក់ផ្សេងទៀត ត្រូវបានសម្លាប់ដោយការវាយប្រហារដោយគ្រាប់រ៉ុក្កែត នៅជិតព្រំដែននៃប្រទេសលីបង់ជាមួយប្រទេសអ៊ីស្រាអែល នៅថ្ងៃអង្គារ (ទី២១ ខែវិច្ឆិកា) នេះ។

ទីភ្នាក់ងារនេះបានឲ្យដឹងថា ហេតុការណ៍នេះ បានកើតឡើងនៅជិតទីក្រុង Tir Harfa ចម្ងាយប្រហែល ១ម៉ាយល៍ (១,៦០៩គីឡូម៉ែត្រ) ពីព្រំដែនអ៊ីស្រាអែល។ ទូរទស្សន៍ Al Mayadeen របស់លីបង់ ដែលអ្នកសារព័ត៌មានទាំង ២នាក់ ធ្វើការឲ្យ មុនពេលត្រូវបានសម្លាប់នោះ បានប្រាប់ថា អ៊ីស្រាអែលបានធ្វើការវាយប្រហារ និងបានកំណត់គោលដៅលើអ្នកកាសែតដោយចេតនា។ ពាក់ព័ន្ធនឹងការលើកឡើងនេះ យោធាអ៊ីស្រាអែលមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

ការប្រយុទ្ធគ្នារវាងអ៊ីស្រាអែល និងក្រុមហេសបូឡាហ៍ ដែលគាំទ្រដោយអ៊ីរ៉ង់ បានផ្ទុះឡើងបន្ទាប់ពីក្រុមហាម៉ាសប៉ាឡេស្ទីន បានបើកការវាយប្រហារលើអ៊ីស្រាអែល កាលពីថ្ងៃទី ៧ ខែតុលា ហើយអំពើហិង្សាតាមព្រំដែន បានកើនឡើងជាលំដាប់ ដែលធ្វើឲ្យលោកខាងលិចមានការភ័យខ្លាចកាន់តែខ្លាំងឡើងៗថា សង្រ្គាមរីករាលកាន់តែធំនៅមជ្ឈិមបូព៌ា ដែលអាចទាញទាំងសហរដ្ឋអាមេរិក និងអ៊ីរ៉ង់ឲ្យពាក់ព័ន្ធ។

នេះចាត់ទុកថា ជាអំពើហិង្សាដ៏អាក្រក់បំផុតនៅតាមព្រំដែន ចាប់តាំងពីអ៊ីស្រាអែល និងក្រុមហេសបូឡាហ៍ បានមានសង្គ្រាមជាមួយគ្នាក្នុងឆ្នាំ២០០៦ ហើយមកទល់ពេលនេះ ការប្រយុទ្ធគ្នានេះ បានសម្លាប់យុទ្ធជនហេសបូឡាហ៍ជាង ៧០នាក់ ជនស៊ីវិលលីបង់ ១៣នាក់ ទាហានអ៊ីស្រាអែល ៧នាក់ និងជនស៊ីវិលអ៊ីស្រាអែល ៣នាក់៕