នៅថ្ងៃទី២២ ខែវិច្ឆិកា ឆ្នាំ ២០២៣នេះ គឺជាខួបរយៈពេល ៣ខែ ដែលសម្ដេចធិបតី ហ៊ុន ម៉ាណែត បំពេញតួនាទីជានាយករដ្ឋមន្ត្រីកម្ពុជា។ រយៈពេល ៩០ ថ្ងៃនេះ យុវជននានាមើលឃើញពីការរក្សាបាននូវភាពវិជ្ជមានសង្គម ក៏ដូចជាកំណែទម្រង់ និងការដាក់ឱ្យអនុវត្តនូវកម្មវិធីនយោបាយអាទិភាពជាច្រើនដែលមានគោលដៅសំខាន់ផ្តល់អត្ថប្រយោជន៍ដល់ប្រជាពលរដ្ឋ។
រយៈពេល ៣ខែនេះ យុវជននានា បានយល់ឃើញថា ដំណើរការសង្គមគ្រប់យ៉ាងនៅតែមានភាពប្រក្រតី ដំណើរការជាធម្មតា ជាពិសេសការរក្សាបានសុខសន្តិភាព ស្ថិរភាពនយោបាយ ដូចជាការដឹកនាំរបស់រាជរដ្ឋាភិបាលក្នុងនីតិកាលទី ៦ កន្លងទៅ។ យុវជនកោតសសើរដល់កិច្ចប្រឹងរបស់ សម្ដេចធិបតី ហ៊ុន ម៉ាណែត ក្នុងការដាក់ឱ្យអនុវត្តកម្មវិធីនយោបាយជាច្រើន ក្នុងគោលដៅសំខាន់ផ្តល់អត្ថប្រយោជន៍ដល់ប្រជាពលរដ្ឋ ពិសេសពលរដ្ឋក្រុមគោលដៅដែលមានជីវភាពខ្វះខាត ប្រជាកសិករជាដើម។ ពួកគេមើលឃើញថា រាជរដ្ឋាភិបាលថ្មី ក្រោមការដឹកនាំរបស់សម្ដេចធិបតី នៅតែមានការគិតគូខ្ពស់ពីប្រជាពលរដ្ឋ។ ម្យ៉ាងវិញទៀតពួកគេក៏ពេញចិត្តចំពោះកំណែទម្រង់ ពិសេសការជ្រើសរើសមន្ត្រីឱ្យចូលបម្រើការងារក្នុងស្ថាប័នរដ្ឋ។
សូមជម្រាបថា រាជរដ្ឋាភិបាលអាណត្តិទី៧ ក្រោមការដឹកនាំដោយសម្ដេចធិបតី ហ៊ុន ម៉ាណែត ក្នុងរយៈពេល ៣ខែមកនេះ ក៏បានដាក់ឱ្យអនុវត្តកម្មវិធីមួយចំនួនរួមមានទាំងការដាក់ឱ្យអនុវត្តកម្មវិធីជាតិជំនួយសង្គមផ្នែកបណ្ដុះបណ្ដាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ កម្មវិធីលលើកស្ទួយផលិតកម្មកសិកម្មរកទីផ្សារ និងរក្សាលំនឹងថ្លៃកសិផលតាមរយៈកម្មវិធីហិរញ្ញប្បទាន ការដាក់ពង្រាយមន្ត្រីកសិកម្មឃុំ សង្កាត់ និងការអភិវឌ្ឍសហគមន៍កសិកម្មទំនើប និងមានការដាក់ឱ្យអនុវត្តរបបសន្តិសុខសង្គម ផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់បុគ្គលស្វ័យយោជន៍ និងអ្នកក្នុងបន្ទុកសមាជិកបេឡាជាតិរបបសន្តិសុខសង្គម ជាដើម៕ អត្ថបទ៖ គឹម ហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
