ដោយប្រើប្រាស់ឈ្មោះ ប្រវត្តិរូប ឯកសារការងារ និងសំណេរអត្ថបទសម្ភាសន៍ក្លែងក្លាយ បុគ្គលិកផ្នែកព័ត៌មានវិទ្យារបស់កូរ៉េខាងជើង ដែលកំពុងស្វែងរកការងារធ្វើនៅក្នុងក្រុមហ៊ុនបច្ចេកវិទ្យាលោកខាងលិច កំពុងដាក់ពង្រាយឧបករណ៍បំប្លែងដ៏ទំនើបដើម្បីទទួលបានការងារ។

ការទទួលបានការងារនៅខាងក្រៅប្រទេសកូរ៉េខាងជើង ដើម្បីរកប្រាក់កម្រៃដោយសម្ងាត់សម្រាប់ប្រទេសឯកោមួយនេះ ទាមទារយុទ្ធសាស្រ្តអភិវឌ្ឍន៍ខ្ពស់ដើម្បីបញ្ចុះបញ្ចូលអ្នកគ្រប់គ្រងការជួលបុគ្គលិកលោកខាងលិច ឲ្យផ្ដល់ការងារដល់ពួកគេ នេះបើយោងតាមឯកសារដែលត្រូវបានពិនិត្យដោយសារព័ត៌មាន រ៉យទ័រ កិច្ចសម្ភាសន៍ជាមួយអតីតបុគ្គលិកផ្នែកព័ត៌មានវិទ្យាកូរ៉េខាងជើង និងក្រុមអ្នកស្រាវជ្រាវសន្តិសុខតាមអ៊ីនធឺណិត។

កូរ៉េខាងជើង បានបញ្ជូនបុគ្គលិកព័ត៌មានវិទ្យា រាប់ពាន់នាក់ទៅក្រៅប្រទេស ដែលជាកិច្ចខិតខំប្រឹងប្រែងដែលបានពន្លឿនក្នុងរយៈពេល ៤ ឆ្នាំចុងក្រោយនេះ ក្នុងការនាំយកប្រាក់រាប់លានដុល្លារដើម្បីផ្តល់ហិរញ្ញប្បទានដល់កម្មវិធីមីស៊ីលនុយក្លេអ៊ែររបស់ទីក្រុងព្យុងយ៉ាង នេះបើយោងតាមសហរដ្ឋអាមេរិក កូរ៉េខាងត្បូង និងអង្គការសហប្រជាជាតិ។

ស្គ្រីបក្លែងក្លាយចំនួនសរុប ៣០ ទំព័រ ត្រូវបានរកឃើញដោយក្រុមអ្នកស្រាវជ្រាវនៅទីភ្នាក់ងារ ប៉ាឡូ អាល់តូ (Palo Alto) ដែលជាក្រុមហ៊ុនសន្តិសុខតាមអ៊ីនធឺណិតរបស់សហរដ្ឋអាមេរិក។ ឯកសារទាំងនោះរួមមានប្រវត្តិរូបក្លែងបន្លំរាប់សិបច្បាប់ ប្រវត្តិរូបតាមអ៊ីនធឺណិត អត្ថបទសម្ភាសន៍ និងអត្តសញ្ញាណក្លែងក្លាយ ដែលបុគ្គលិកកូរ៉េខាងជើង ធ្លាប់ដាក់ពាក្យសុំការងារក្នុងផ្នែកការអភិវឌ្ឍន៍កម្មវិធី៕