រដ្ឋាភិបាលសហរដ្ឋអាមេរិកឲ្យដឹងថា ក្រុមហ៊ុន Binance ដែលជាក្រុមហ៊ុនប្តូររូបិយប័ណ្ណគ្រីពតូដ៏ធំបំផុតរបស់ពិភពលោក បានយល់ព្រមបង់ប្រាក់ពិន័យជាង ៤ពាន់លានដុល្លារ ដែលពាក់ព័ន្ធនឹងការរំលោភលើច្បាប់ប្រឆាំងនឹងការសម្អាតប្រាក់ និងទណ្ឌកម្មរបស់សហរដ្ឋអាមេរិក។

សេចក្ដីប្រកាសពីការពិន័យនេះ ត្រូវបានធ្វើឡើងដោយរដ្ឋមន្ត្រីក្រសួងយុត្តិធម៌ លោក Merrick Garland និងរដ្ឋមន្ត្រីក្រសួងរតនាគារ លោកស្រី Janet Yellen នៅក្នុងសន្និសីទសារព័ត៌មាន កាលពីថ្ងៃអង្គារ (ទី២១ ខែវិច្ឆិកា)។ រដ្ឋមន្ត្រីទាំង២ បានប្រាប់ថា ក្រុម Binance មិនបានចាត់វិធានការ ដើម្បីទប់ស្កាត់ប្រតិបត្តិការ ដែលទាក់ទងនឹងក្រុមអ៊ីស្លាម គឺកងពលតូចអាល់កាសាម (Al-Qassam Brigades) របស់ក្រុមហាម៉ាស និងអង្គការភេរវករផ្សេងទៀត ដូចជាអាល់កៃដាជាដើម។

ជាមួយគ្នានេះ រដ្ឋមន្ត្រីទាំង២ ក៏បាននិយាយផងដែរថា ការផ្លាស់ប្តូរ បានអនុញ្ញាតឲ្យមានប្រតិបត្តិការដែលបំពានលើការដាក់ទណ្ឌកម្មរបស់សហរដ្ឋអាមេរិក ដូចជាដំណើរការ រវាងអ្នកប្រើប្រាស់នៅអ៊ីរ៉ង់ និងកូរ៉េខាងជើង និងអ្នកដែលរស់នៅសហរដ្ឋអាមេរិក ហើយអ្នកទាំង២ បានបញ្ជាក់ថា សកម្មភាពទាំងនេះ និងសកម្មភាពផ្សេងទៀត គឺជាការសម្អាតលុយ។

រដ្ឋាភិបាលសហរដ្ឋអាមេរិកបានឲ្យដឹងបន្ថែមថា ក្រុមហ៊ុន Binance បានទទួលស្គាល់នូវការរំលោភបំពាននេះ ហើយបានយល់ព្រមបង់ប្រាក់សរុបចំនួន ៤,៣៦៨ពាន់លានដុល្លារ ខណៈដែលលោកស្រី Yellen បាននិយាយថា ការប្រកាសនេះ គឺជាការផ្ញើសារទៅកាន់ឧស្សាហកម្មរូបិយប័ណ្ណសិប្បនិម្មិត៕