រដ្ឋបាលលោកបៃដិន កំពុងដាក់សម្ពាធជាសាធារណៈដល់ក្រុមសកម្មប្រយុទ្ធប៉ាឡេស្ទីនហាម៉ាស ឲ្យប្រគល់ខ្លួនក្រុមមេក្លោង នៅពីក្រោយការវាយប្រហារភេរវកម្មកាលថ្ងៃទី៧ ខែតុលា លើអ៊ីស្រាអែលភាគខាងត្បូង ជាអ្វីដែលហាក់ដូចជាការប៉ុនប៉ងសម្របសម្រួល ដើម្បីបំបែកក្រុមហាម៉ាស និងមេដឹកនាំប៉ាឡេស្ទីន ដែលនៅពាសពេញតំបន់ហ្កាហ្សាស្ទ្រីប និងតំបន់វេសបែង និងបណ្តាប្រទេសក្នុងតំបន់ដូចជាកាតា ទួរគី និងលីបង់ជាដើម។

លោក Brett McGurk ប្រមុខនៃកងកម្លាំងរបស់សេតវិមាន នៅមជ្ឈិមបូព៌ា បានប្រាប់កិច្ចប្រជុំនៃក្រុមមេដឹកនាំ និងក្រុមអ្នកការទូតអារ៉ាប់ នៅប្រទេសបារ៉ែន កាលពីថ្ងៃសៅរ៍ថា៖«ប្រសិនបើក្រុមហាម៉ាស ចង់ការពារប្រជាជន នៅតំបន់ហ្កាហ្សា ក្រុមនេះ អាចដោះលែងចំណាប់ថ្នូរ ប្រគល់ខ្លួនក្រុមមេដឹកនាំ និងអ្នកទទួលខុសត្រូវចំពោះការវាយប្រហារ នៅថ្ងៃទី៧ ខែតុលា»។

លោកប្រធានាធិបតី ចូ បៃដិន បានសង្កត់ធ្ងន់លើចំណុចដូចគ្នានេះ នៅក្នុងទស្សនៈមួយ ដែលបានចេញផ្សាយ កាលពីថ្ងៃអាទិត្យ នៅក្នុងសារព័ត៌មានវ៉ាស៊ីនតោប៉ុស្តិ៍ស្តីពីសង្រ្គាមអ៊ុយក្រែន និងមជ្ឈិមបូព៌ា។

លោកបានសរសេរថា៖«ប្រសិនបើក្រុមហាម៉ាស យកចិត្តទុកដាក់ទាំងស្រុងចំពោះជីវិតរបស់ប៉ាឡេស្ទីន ក្រុមនេះ នឹងដោះលែងចំណាប់ថ្នូរទាំងអស់ បោះបង់អាវុធ និងប្រគល់ខ្លួនមេដឹកនាំ និងអ្នកទទួលខុសត្រូវចំពោះការវាយប្រហារនៅថ្ងៃទី៧ ខែតុលា»។

មន្ត្រីសហរដ្ឋអាមេរិកទទួលស្គាល់ថា ការទាមទាររបស់សេតវិមាន គឺប្រាកដថា មិនត្រូវបានអើពើដោយក្រុមហាម៉ាសឡើយ។ ប៉ុន្តែពួកគេ និយាយថា វានៅតែមានសារៈសំខាន់ក្នុងការផ្តួចផ្តើមដំណើរការរៀបចំកងជីវពល និងអង្គការនយោបាយឲ្យទទួលខុសត្រូវចំពោះការវាយប្រហាររបស់ខ្លួន កាលពីខែមុន ដែលបានសម្លាប់ជនជាតិអ៊ីស្រាអែលចំនួន១.២០០នាក់។ តំបន់មជ្ឈិមបូព៌ា ត្រូវបានបែងចែកយ៉ាងស៊ីជម្រៅលើក្រុមហាម៉ាស ស្ថានភាពរបស់ខ្លួន និងផ្លូវឆ្ពោះទៅមុខ បន្ទាប់ពីការប្រយុទ្ធគ្នាបច្ចុប្បន្ន បានបញ្ចប់។