ភ្នំពេញ ៖ ក្នុងទិសដៅការងារអាទិភាពចំនួន៦ចំណុច ទៅកាន់ក្រសួងការងារ និងបណ្ដុះបណ្ដាលវិជ្ជាជីវៈ ក្នុងអាណិត្តទី៧នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យសហការជាមួយក្រសួង ស្ថាប័នពាក់ព័ន្ធអនុវត្តក្នុងឆ្នាំនេះ ដើម្បីជាប្រយោជន៍ជូនកម្មករ និយោជិត។ ក្នុងនោះ ក៏បានជំរុញឲ្យមានការកែលម្អកន្លែងហូបបាយ ឬអាហារដ្ឋាននៅតាមរោងចក្រឲ្យមានភាពល្អប្រសើរផងដែរ។​

ក្រុមកម្មការិនីក្នុងរោងចក្រកាត់ដេរសម្លៀកបំពាក់ តូយ៉ូគិ ស្ថិតនៅស្រុកកំពង់ត្រឡាច ខេត្តកំពង់ឆ្នាំង បាននិយាយថា ថ្វីត្បិតកន្លែងការងាររបស់ពួកគាត់ មានកន្លែងហូបបាយត្រឹមត្រូវ និងមានការយកចិត្តទុកដាក់អាហារបន្ថែមទៀតពីថ្នាក់ដឹកនាំរោងចក្រ ប៉ុន្តែពួកគាត់ចង់ឲ្យមានការចូលរួមទាំងអស់គ្នា ក្នុងការទទួលអាហារឲ្យបានត្រឹមត្រូវ និងចូលរួមរក្សាអនាម័យឲ្យបានគ្រប់ៗគ្នា ដើម្បីសុខភាពល្អ និងចៀសផុតពីរោគាទាំងឡាយ។ កម្មការិនីទាំងនេះ ក៏បានអំពាវនាវទៅកាន់អ្នកលក់ដូរម្ហូបអាហារតាមរោងចក្រទាំងអស់ មេត្តារក្សាអនាម័យឲ្យបានល្អដូចគ្នា និងត្រូវគិតគូរសុខភាពជាចម្បង។

កាលពីពេលកន្លងទៅនេះ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា នឹងសហការជាមួយភាគីពាក់ព័ន្ធ ជំរុញការកែលម្អកន្លែងហូបបាយ ឬអាហារដ្ឋាននៅតាមរោងចក្រ ដែលកំពុងដំណើរការឲ្យបានសមរម្យសម្រាប់កម្មករនិយោជិត និងតម្រូវឲ្យមានការរៀបចំកន្លែងហូបបាយ ឬអាហារដ្ឋានសម្រាប់រោងចក្រដែលត្រូវបង្កើតថ្មី ដែលចំណុចនេះ ក្រសួងនឹងធ្វើការជាមួយក្រសួងដែនដី និងនគរូបនីយកម្ម ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្ត និងអគ្គលេខាធិការដ្ឋានក្រុមប្រឹក្សាអភិវឌ្ឍកម្ពុជា ដើម្បីកំណត់ស្តង់ដាររោងចក្រថ្មី។

សូមបញ្ជាក់ទៀតថា ក្រៅពីការកែលម្អកន្លែងហូបបាយ ឬអាហារដ្ឋាននៅតាមរោងចក្រនេះ ការងារអាទិភាពចំនួន៣ផ្សេងទៀត ដែលក្រសួងការងារ និងបណ្ដុះបណ្ដាលវិជ្ជាជីវៈ នឹងត្រូវអនុវត្ត មានដូចជា៖ ការសិក្សាលទ្ធភាពដើម្បីបង្កើតទារកដ្ឋាន និងមតេយ្យសហគមន៍ នៅតាមតំបន់ដែលមានរោងចក្រ , សហការជាមួយភាគីពាក់ព័ន្ធ ដើម្បីសិក្សាយន្តការគាំទ្រ និងលើកទឹកចិត្តឲ្យមានការផ្លាស់ប្តូរជាបណ្តើរៗនូវមធ្យោបាយដឹកជញ្ជូនកម្មករនិយោជិត និងជំរុញកម្មវិធីតេស្តទទួលស្គាល់ជំនាញ៕ អត្ថបទ៖ ឈិត បូរ៉ាវី