ក្រុមសកម្មប្រយុទ្ធដ៏សំខាន់ដែលគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ បានព្រមានកាលពីថ្ងៃពុធថា ខ្លួនអាចនឹងវាយប្រហារគោលដៅបន្ថែមរបស់សហរដ្ឋអាមេរិក បន្ទាប់ពីយន្តហោះចម្បាំងរបស់សហរដ្ឋអាមេរិក បានសម្លាប់ក្រុមសកម្មប្រយុទ្ធជាច្រើននាក់ ជាការឆ្លើយតបទៅនឹងការប្រើប្រាស់មីស៊ីលបាលិស្ទិករយៈចម្ងាយខ្លីជាលើកដំបូងប្រឆាំងនឹងកងកម្លាំងសហរដ្ឋអាមេរិក នៅឯមូលដ្ឋានទ័ពអាកាស Al-Asad កាលពីដើម សប្តាហ៍នេះ។

មន្ត្រីការពារជាតិពីររូប បាននិយាយក្នុងលក្ខខណ្ឌមិនបញ្ចេញឈ្មោះ ដើម្បីផ្តល់ព័ត៌មានលម្អិតរសើបបន្ថែមនៃការវាយប្រហារថា យន្តហោះចម្បាំងអាមេរិក បានវាយប្រហារទៅលើមជ្ឈមណ្ឌលប្រតិបត្តិការ Kataib Hezbollah និងទីបញ្ជាការ Kataib Hezbollah នៅជិតខេត្ត Al Anbar និង Jurf al Saqr ភាគខាងត្បូងទីក្រុងបាកដាដ កាលពីថ្ងៃអង្គារ។

មានបុគ្គលិកនៃទីបញ្ជាការ Kataib Hezbollah នៅកន្លែងទាំងពីរ នៅពេលដែលការវាយប្រហារ បានកើតឡើង ប៉ុន្តែក្រុមមន្ត្រី បាននិយាយថា ពួកគេមិនទាន់អាចបញ្ជាក់បានថា តើនរណាម្នាក់នៅទីនោះ ត្រូវបានសម្លាប់ទេ។

មន្ត្រីកងជីវពលក្នុងប្រទេសអ៊ីរ៉ាក់ បាននិយាយថា ការវាយប្រហារនោះ បានសម្លាប់សមាជិកចំនួន៨នាក់របស់ទីបញ្ជាការ Kataib Hezbollah។

ការវាយប្រហារតាមអាកាសរបស់សហរដ្ឋអាមេរិក បានធ្វើឡើងបន្ទាប់ពីការវាយប្រហារសងសឹកដំបូងដោយកាំភ្លើង AC-130 ដែលស្ថិតនៅលើអាកាស នៅពេលដែលក្រុមសកម្មប្រយុទ្ធគាំទ្រដោយអ៊ីរ៉ង់ បានបាញ់មីស៊ីលបាលិស្ទិករយៈចម្ងាយខ្លីចំនួនពីរគ្រាប់ នៅឯមូលដ្ឋានអាកាស Al-Asad ក្នុងប្រទេសអ៊ីរ៉ាក់កាលពីល្ងាចថ្ងៃចន្ទ។ ឧទ្ធម្ភាគចក្រប្រដាប់ដោយអាវុធធុនធ្ងន់ អាចកំណត់ទីតាំងប្រភពនៃមីស៊ីលទាំងនោះ ហើយបានបាញ់ទៅលើក្រុមសកម្មប្រយុទ្ធជាច្រើននាក់ ដែលបានរត់គេចខ្លួននៅក្នុងរថយន្តមួយគ្រឿង ដោយបានសម្លាប់ពួកគេជាច្រើននាក់។

-