ភ្នំពេញ៖ មជ្ឈមណ្ឌលបណ្ដុះធុរកិច្ចថ្មី “តេជោ” នៅព្រឹកថ្ងៃទី២៣ ខែវិច្ឆិកានេះ បានបើកកិច្ចពិភាក្សា ក្រោមប្រធានបទ "ហេតុអ្វីត្រូវចុះបញ្ជីអាជីវកម្មនិងស្នើសុំអាជ្ញាបណ្ណជំនាញ" ដើម្បីលើកទឹកចិត្តទៅដល់អ្នកត្រៀមបើកអាជីវកម្ម ឬអ្នកទើបចាប់ផ្តើមអាជីវកម្ម ជាពិសេសទៅដល់អ្នកដែលមានបំណងចុះបញ្ជីប្រកបអាជីវកម្មសេដ្ឋកិច្ចក្នុងប្រព័ន្ធ ដើម្បីអាចទទួលបានការគាំទ្រនានាពីរាជរដ្ឋាភិបាល។

លោក អេង រតនា ប្រធាននាយកដ្ឋាន នៃអគ្គនាយកដ្ឋានពន្ធដារ បានមានប្រសាសន៍ថា នៅក្នុងយុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ និងយោងតាមអនុសាសន៍ណែនាំរបស់សម្តេចនាយករដ្ឋមន្រ្តីអាណត្តិទី៧នេះ បានផ្តល់ការលើកទឹកចិត្តយ៉ាងច្រើន ទៅដល់អ្នកដែលមានបំណងចុះបញ្ជីប្រកបអាជីវកម្មសេដ្ឋកិច្ចក្នុងប្រព័ន្ធ ដើម្បីអាចទទួលបានការគាំទ្រនានាពីរាជរដ្ឋាភិបាល ដូចជាការលើកលែងកាតព្វកិច្ចអនុលោមភាព និងការលើកលែងការផាកពិន័យនានា សម្រាប់អាជីវកម្មដែលបានដំណើរការ និងមិនបានចុះបញ្ជីត្រឹមត្រូវ។

លោកបានបន្តថាការចុះបញ្ជីជាទូទៅ សម្រាប់សហគ្រាសឯកបុគ្គល មិនចាំបាច់បើកក្រុមហ៊ុននោះទេ គ្រាន់តែចុះបញ្ជីឲ្យស្ថាប័នរដ្ឋទទួលស្គាល់ និងមានកាតព្វកិច្ចប្រកាសពន្ធ។ ប៉ុន្តែ សម្តេចនាយករដ្ឋមន្រ្តីបានប្រកាសហើយថា បើគាត់ចុះបញ្ជី គឺរដ្ឋាភិបាលលើកទឹកចិត្តច្រើន តាំងពីការចុះបញ្ជីស្ម័គ្រចិត្ត គឺអត់យកកម្រៃ ហើយអត់ឲ្យបង់ប៉ាតង់ថែមទៀត ហើយនៅពេលចុះបញ្ជីរួចហើយទៀត រយៈពេល២ឆ្នាំ អត់យកពន្ធលើប្រាក់ចំណូល រំដោះពន្ធលើប្រាក់ចំណូល ពន្ធអប្បបរមា ពោលគឺលើកលែងរយៈពេល ២ឆ្នាំ ប៉ុន្តែប្រសិនបើមិនចូល គាត់នៅតែរកស៊ីក្រៅច្បាប់ ហើយគេចាប់បាន នឹងរងការផាកពិន័យថែមទៀត ព្រោះកាតព្វកិច្ចនៃច្បាប់តម្រូវឲ្យចុះបញ្ជី។

ពាក់ព័ន្ធការចុះបញ្ជីពាណិជ្ជកម្ម លោក ស៊ូ ម៉ង់ អនុប្រធាននាយកដ្ឋានចុះបញ្ជីពាណិជ្ជកម្ម នៃក្រសួងពាណិជ្ជកម្ម បានបញ្ជាក់ថា យោងតាមច្បាប់ នៅពេលអ្នកចង់បង្កើតអាជីវកម្ម ដើម្បីស្វែងរកប្រាក់ចំណេញ អ្នកត្រូវធ្វើការចុះបញ្ជីពាណិជ្ជកម្មលើអាជីវកម្មរបស់អ្នកនៅក្រសួងពាណិជ្ជកម្ម ពីព្រោះ ការចុះបញ្ជីពាណិជ្ជកម្ម វាពិតជាមានសារៈសំខាន់ណាស់ ដើម្បីបង្ហាញថា អាជីវកម្មមួយជាអាជីវកម្មស្របច្បាប់ និងទទួលបានការការពារដោយច្បាប់នៅពេលមានជម្លោះ ឬក៏បញ្ហាណាមួយដែលកើតឡើងជាយថាហេតុ។ ប៉ុន្តែការចុះបញ្ជីនេះទៀតសោត ទាមទារឱ្យមានការយល់ដឹងពីផ្នែកហិរញ្ញវត្ថុឱ្យបានច្បាស់លាស់ នៅក្នុងអាជីវកម្មនីមួយៗ ឬនិយាយឱ្យចំ គឺលំហូរសាច់ប្រាក់នៅក្នុងអាជីវកម្មរបស់ខ្លួនថា អាចរកប្រាក់ចំណូល និងចំណេញបានប៉ុណ្ណាដែរ។

សូមបញ្ជាក់ថា សម្រាប់អ្នកប្រកបអាជីវកម្ម ដែលរកចំណូលក្រោម ២៥០,០០០,០០០រៀល ឬស្មើនឹងប្រមាណ ៦ម៉ឺន ៥ពាន់ដុល្លារ ក្នុង១ឆ្នាំ មិនតម្រូវឲ្យបង់ពន្ធនោះទេ ប៉ុន្តែបើចំនួនលើសពីនេះ គឺតម្រូវឲ្យចុះបញ្ជី និងបង់ពន្ធជូនរដ្ឋ។

ដោយឡែក ទាក់ទិនកិច្ចពិភាក្សា "ហេតុអ្វីត្រូវចុះបញ្ជីអាជីវកម្មនិងស្នើសុំអាជ្ញាបណ្ណជំនាញ" ត្រូវបានរៀបចំឡើងក្នុងគោលបំណងសំខាន់ៗចំនួន៥ ដូចជា៖១) ជំរុញបរិវត្តកម្មឌីជីថលសហគ្រាស និងលើកកម្ពស់សហគ្រិនភាព និងធុរកិច្ចថ្មី, ២) បញ្ជ្រាបការយល់ដឹងអំពី ធុរកិច្ចថ្មីដល់តួអង្គពាក់ព័ន្ធ ជាពិសេសទៅដល់យុវជនដែលមានបំណងចង់បង្កើតធុរកិច្ចថ្មី, ៣ ) ផ្សព្វផ្សាយអំពី នីតិវិធីចុះបញ្ជីអាជីវកម្ម, នីតិវិធីស្នើសុំអាជ្ញាបណ្ណជំនាញ និងសេវាគាំទ្រផ្សេងៗពាក់ព័ន្ធនឹងការធ្វើអាជីវកម្ម និងការបង្កើតធុរកិច្ចថ្មី, ៤) ពង្រីកបណ្ដាញគាំទ្រ និងកៀរគរតួអង្គពាក់ព័ន្ធក្នុងការពង្រឹងប្រព័ន្ធអេកូឡូស៊ីធុរកិច្ចថ្មី និង ៥) ផ្សារភ្ជាប់សហគ្រិន និងនវានុវត្តន៍ជាមួយអ្នកជំនាញតាមវិស័យនីមួយៗ៕ អត្ថបទ៖ ឈិត បូរ៉ាវី