បេក្ខភាពមេដឹកនាំលំដាប់ទី២សម្រាប់គណបក្សកាន់អំណាចរបស់កោះតៃវ៉ាន់ នៅថ្ងៃព្រហស្បតិ៍ (ទី២៣ ខែវិច្ឆិកា)នេះ បាននិយាយថា ការមានសង្គ្រាមជាមួយប្រទេសចិន មិនមែនជាជម្រើសដ៏ល្អនោះទេ ដោយលើកយកទំនាក់ទំនងឆ្លងកាត់ច្រកសមុទ្រថា ជាគន្លឹះក្នុងការបន្ធូរបន្ថយភាពតានតឹង ដែលបានបង្កើនការព្រួយបារម្ភអំពីស្ថិរភាព ក្នុងតំបន់។

ប្រទេសចិន ដែលចាត់ទុកកោះតៃវ៉ាន់ថា ជាទឹកដីរបស់ខ្លួន បើទោះបីជាមានការជំទាស់យ៉ាងខ្លាំងពីរដ្ឋបាលក្នុងទីក្រុងតៃប៉ិក៏ដោយ ហាក់ដូចជាបង្កឲ្យមានក្ដីកង្វល់កាន់តែខ្លាំងចំពោះការបោះឆ្នោត នៅថ្ងៃទី១៣ ខែមករារបស់កោះនេះ ជាពិសេសនៅពេលដែលចិនបានបង្កើនសម្ពាធយោធា ដើម្បីអះអាងចំពោះការទាមទារអធិបតេយ្យរបស់ខ្លួន។

គណបក្សប្រជាធិបតេយ្យជឿនលឿន (DPP) នៅសប្តាហ៍នេះ បានប្រកាសថា លោកស្រី Hsiao Bi-khim ដែលពីមុនជាឯកអគ្គរដ្ឋទូតតាមព្រឹត្តន័យដ៏លេចធ្លោរបស់កោះតៃវ៉ាន់ប្រចាំនៅសហរដ្ឋអាមេរិក ជាដៃគូសម្រាប់បេក្ខភាពមេដឹកនាំរបស់គណបក្ស គឺលោក Lai Ching-te ដែលជាអ្នកនាំមុខគេ ក្នុងការបានក្លាយជាមេដឹកនាំបន្ទាប់របស់កោះនេះ។

សម្រាប់ប្រទេសចិន ទាំងលោក Lai និងលោកស្រី Hsiao គឺមិនស្ថិតក្នុងចំណោមបុគ្គល ដែលខ្លួនចូលចិត្តនោះឡើយ ដោយទីក្រុងប៉េកាំងចាត់ទុកអ្នកទាំង២ថា ជាអ្នកបំបែកខ្លួន ហើយបានដាក់ទណ្ឌកម្មលើលោកស្រី Hsiao ចំនួន ២ដង ដែលថ្មីៗនេះចុងក្រោយបំផុត គឺនៅក្នុងខែមេសា។

លោកស្រី Hsiao បានប្រាប់អ្នកសារព័ត៌មានថា «មិត្តអន្តរជាតិជាច្រើន» ក៏ត្រូវបានចិនដាក់ទណ្ឌកម្មផងដែរ ហើយលោកស្រីនឹងបន្តទៅមុខក្នុងការប្តេជ្ញាចិត្តការពារលទ្ធិប្រជាធិបតេយ្យរបស់កោះតៃវ៉ាន់។ លោកស្រីបានបន្តថា៖ «យើងបានបញ្ជាក់ពីជំហររបស់យើងជាថ្មីម្ដងទៀតថា យើងនៅតែបើកចំហជានិច្ច សម្រាប់ការសន្ទនា ដែលថា យើងក៏ប្តេជ្ញាឲ្យមានស្ថានភាពដដែល»។

លោកស្រី បានសង្កត់ធ្ងន់ថា៖ «វាក៏មានសារៈសំខាន់ផងដែរ ដែលថា សហគមន៍អន្តរជាតិ ដែលក៏យល់ស្របនឹងជំហររបស់យើង ក្នុងការបន្តរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ បញ្ជាក់យ៉ាងច្បាស់លាស់ដល់សមភាគីរបស់យើង នៅទូទាំងច្រកសមុទ្រតៃវ៉ាន់ថា ការសន្ទនាគឺជាមធ្យោបាយតែមួយគត់ ដើម្បីដោះស្រាយការខ្វែងគំនិតគ្នា ដ្បិតសង្គ្រាមមិនមែនជាជម្រើសដ៏ល្អនោះទេ»៕