មេដឹកនាំនៃប្រទេសអង់គ្លេស និងកូរ៉េខាងត្បូង បានព្រមព្រៀងគ្នា ក្នុងការបង្កើនកិច្ចសហប្រតិបត្តិការលើផ្នែកសន្តិសុខ និងបច្ចេកវិទ្យា ដោយក្នុងនោះរួមបញ្ចូលទាំងការល្បាតកងទ័ពជើងទឹករួមគ្នា ដើម្បីទប់ស្កាត់ការផ្ទេរនាវារបស់កូរ៉េខាងជើង។

កូរ៉េខាងជើងបាននិងកំពុងទទួលបានរូបិយប័ណ្ណបរទេសខុសច្បាប់ ដោយការផ្ទេរទំនិញពីនាវាទៅនាវាដោយបំពាននឹងទណ្ឌកម្មរបស់អង្គការសហប្រជាជាតិ។

ប្រធានាធិបតីកូរ៉េខាងត្បូង លោក Yoon Suk-yeol បានជួបជាមួយនាយករដ្ឋមន្ត្រីអង់គ្លេសលោក Rishi Sunak កាលពីថ្ងៃអង្គារ (ទី២១ ខែវិច្ឆិកា) អំឡុងទស្សនកិច្ចផ្លូវរដ្ឋទៅកាន់ចក្រភពអង់គ្លេស ដោយជំនួបរវាងមេដឹកនាំទាំង២ ធ្វើឡើងចំពេលមានការព្រួយបារម្ភកាន់តែខ្លាំងឡើងៗ ជុំវិញការបាញ់បង្ហោះផ្កាយរណបឈ្លបយកការណ៍យោធារបស់កូរ៉េខាងជើង។

អំឡុងការជួបពិភាក្សាគ្នានោះ មេដឹកនាំទាំង២ បានព្រមព្រៀងគ្នាក្នុងការជំរុញកិច្ចសហប្រតិបត្តិការ រវាងទីភ្នាក់ងារស៊ើបការណ៍សម្ងាត់របស់ប្រទេសទាំង២ ដើម្បីតាមរកឲ្យកាន់តែប្រសើរជាងមុន និងទប់ស្កាត់ការវាយប្រហារតាមប្រព័ន្ធអ៊ីនធឺណិត ដែលជាប្រភពមូលនិធិដ៏សំខាន់ជាក់ស្តែង សម្រាប់កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។

លោក Yoon បានលើកឡើងនៅក្នុងសុន្ទរកថាទៅកាន់សភារបស់ចក្រភពអង់គ្លេស នៅមុនកិច្ចប្រជុំកំពូលថា ប្រទេសទាំង២ នឹងធ្វើការកាន់តែជិតស្និទ្ធជាមួយគ្នា ដើម្បីប្រយុទ្ធប្រឆាំងនឹងឧក្រិដ្ឋកម្មតាមប្រព័ន្ធអ៊ីនធឺណិតអន្តរជាតិ ក្នុងនោះរួមទាំងអំពើចោរកម្មរូបិយប័ណ្ណគ្រីពតូ និងការលួចចូលតាមប្រព័ន្ធបច្ចេកវិទ្យាផងដែរ។ ចំណែកលោក Sunak បានបង្ហោះសារនៅលើបណ្ដាញសង្គមថា កិច្ចព្រមព្រៀងជាមួយកូរ៉េខាងត្បូង «ធ្វើឲ្យទំនាក់ទំនងដ៏យូរអង្វែងរបស់យើងកាន់តែស៊ីជម្រៅ»៕