ភ្នំពេញ ៖អ្នកជំនាញទេសចរណ៍បានជំរុញដល់និស្សិតកំពុងសិក្សាជំនាញទេសចរណ៍ត្រូវខិតខំសិក្សាលើជំនាញនេះ ខណៈបច្ចុប្បន្នជំនាញវិស័យទេសចរណ៍កំពុងតែត្រូវការធនធានមនុស្សច្រើន ជាពិសេសសមគ្គុទេសទេសចរណ៍ដែលចេះភាសាច្រើន។

​តាមរយៈការធ្វើបឋកថា ក្រោមប្រធានបទទេសចរណ៍នៅកម្ពុជា និងឱកាសការងារ ដល់និស្សិត ចំនួន២០០ នាក់ នៅក្នុងសាកលវិទ្យាល័យជាតិគ្រប់គ្រង នាវេលាព្រឹកថ្ងៃទី២៣ ខែ វិច្ឆិកា ឆ្នាំ២០២៣ នេះ លោកស្រី ឆាយ ស៊ីវលីន ប្រធានសមាគមនទេសចរណ៍កម្ពុជាបានលើកឡើងថា បច្ចុប្បន្នវិស័យទេសចរណ៍កម្ពុជាបានងើបឡើងវិញបណ្តើរៗវិញ ក្រោយវិបត្តិជំងឺកូវីដ-១៩ បានធូរស្បើយ។ 

លោកសាស្រាចារ្យ អ៊ុង វាសនា សាកលវិទ្យាធិការរងមហាវិទ្យាល័យទេសចរណ៍នៃសកលវិទ្យាល័យជាតិគ្រប់គ្រងថ្លែងថា ជំនាញក្នុងវិស័យទេសចរណ៍នេះ ពិតជាមានតម្រូវការខ្ពស់ណាស់ ដូច្នេះសាកលវិទ្យាល័យរៀបចំឱ្យមានការជួបជុំគ្នារវាងវាគ្មិនជំនាញៗ និងនិស្សិតផ្នែកទេសចរណ៍នៅក្នុងសាកលវិទ្យាល័យនាពេលនេះដើម្បីចែករំលែកចំណេះដឹង និងបទពិសោធន៍ ដូចជាទទួលបានឱកាសការងារពិតប្រាកដក្រោយពេលបញ្ចប់ការសិក្សាផងដែរ

លោក ហ៊ាង រិទ្ធ សាស្រ្តចារ្យជំនាញក្នុងវិស័យទេសចរណ៍ បានលើកឡើងថា ការបញ្ជៀបចំណេះដឹង និងការផ្សព្វផ្សាយពីសក្តានុពលសម្បូរបែបនៅកម្ពុជាទៅកាន់ពិភពលោក តាមរយៈឌីជីថលពីសំណាក់និសិ្សតជំនាញទេសចរណ៍ និងប្រជាពលរដ្ឋកម្ពុជា ជាកត្តាសំខាន់ចាំបាច់ណាស់ដើម្បីស្រូបទាញភ្ញៀវទេសចរមកពីគ្រប់ជាតិសាសន៍មកលេងកម្សាន្តក្នុងប្រទេសកម្ពុជា។  

យោងតាមរបាយការណ៍ក្រសួងទេសចរណ៍ក្នុងរយៈពេល៩ខែ ឆ្នាំ២០២៣នេះ កម្ពុជាទទួលបានភ្ញៀវទេសចរណ៍អន្តរជាតិជាង ៣លាន ៩សែននាក់ ក្នុងនោះភាគច្រើនជាភ្ញៀវទេសចរក្នុងតំបន់អាស៊ី និងមួយចំនួនទៀតមកពីប៉ែកអ៊ឺរ៉ុប៕ អត្ថបទ ៖ ភារម្យ