យោធាចិន នៅថ្ងៃព្រហស្បតិ៍ (ទី២៣ ខែវិច្ឆិកា) បាននិយាយថា ហ្វីលីពីនបានចូលរួមជាមួយ «កងកម្លាំងបរទេស» ដើម្បីល្បាត នៅសមុទ្រចិនខាងត្បូង ហើយបាននិងកំពុងបង្កជាបញ្ហាឡើង ដោយការលើកឡើងនេះ គឺសំដៅលើការល្បាតរួមគ្នា ក្នុងសប្តាហ៍នេះ ពីសំណាក់កងកម្លាំងហ្វីលីពីន និងសហរដ្ឋអាមេរិក។

យោធារបស់ប្រទេសចិន បាននិយាយថា កម្លាំងយោធាចិននឹងបន្តការប្រុងប្រយ័ត្នខ្ពស់ ការពារដោយឥតរាថយនូវអធិបតេយ្យភាព ហើយនិងសិទ្ធិ និងផលប្រយោជន៍ដែនសមុទ្រ ព្រមទាំងការពារសន្តិភាព និងស្ថិរភាព នៅក្នុងសមុទ្រចិនខាងត្បូងយ៉ាងម៉ឺងម៉ាត់។ កងបញ្ជាការចម្រុះភាគខាងត្បូងរបស់យោធាចិន បាននិយាយថា៖ «ហ្វីលីពីនបានចូលរួមជាមួយកងកម្លាំងក្រៅតំបន់ ដើម្បីល្បាត បង្កបញ្ហា និងចាប់ផ្ដើមនិយាយបំផ្លើស ដែលកំពុងបំផ្លាញសន្តិភាព និងស្ថិរភាព ក្នុងតំបន់»។

សូមបញ្ជាក់ថា មន្ត្រីហ្វីលីពីនបាននិយាយថា យោធារបស់ខ្លួន និងសហរដ្ឋអាមេរិក បានបើកការល្បាតរួមគ្នា កាលពីថ្ងៃអង្គារ (ទី២១ ខែវិច្ឆិកា) នៅក្នុងដែនទឹកក្បែរកោះតៃវ៉ាន់ ជាកោះដែលគ្រប់គ្រងតាមបែបប្រជាធិបតេយ្យ ដែលប្រទេសចិនអះអាងថា ជាចំណែកនៃដែនដីរបស់ខ្លួន ដោយការល្បាតនេះ បានបង្កើនលទ្ធភាពនៃការមានភាពតានតឹងបន្ថែមទៀតជាមួយចិន។

ទំនាក់ទំនងរវាងចិន និងហ្វីលីពីន បានចាប់ផ្ដើមកាន់តែល្អក់កករខ្លាំងឡើង ដោយសារបញ្ហាសមុទ្រចិនខាងត្បូង ក្រោមការដឹកនាំរបស់ប្រធានាធិបតីហ្វីលីពីន លោក Ferdinand Marcos Jr ខណៈដែលលោកបង្វែរឆ្ពោះទៅរកការមានទំនាក់ទំនងកាន់តែជិតស្និទ្ធជាមួយសហរដ្ឋអាមេរិក ដែលគាំទ្រប្រទេសអាស៊ីអាគ្នេយ៍មួយនេះ ក្នុងជម្លោះដែនសមុទ្រជាមួយចិន៕