ថៃ ៖ អាជ្ញាធរទេសចរណ៍ថៃ (TAT) នៅថ្ងៃសុក្រ (ទី២៤ ខែវិច្ឆិកា) នេះ បាននិយាយថា ប្រទេសថៃរំពឹងថា នឹងទទួលបានភ្ញៀវទេសចរពី ៣,៤ ទៅ ៣,៥លាននាក់ពីប្រទេសចិន នៅឆ្នាំនេះ ពោលគឺទាបជាងគោលដៅរបស់ខ្លួន បើទោះបីជាបានដាក់ចេញនូវកម្មវិធីគ្មានទិដ្ឋាការ ដើម្បីទាក់ទាញភ្ញៀវទេសចរចិនក៏ដោយ។

របាយការណ៍បាននិយាយថា ភ្ញៀវទេសចរចិនប្រហែល ៣,០១លាននាក់ បានមកលេងកម្សាន្តប្រទេសនេះ រហូតមកដល់ពេលនេះ។ ប្រទេសចិនគឺជាប្រភពទីផ្សារដ៏ធំ សម្រាប់ឧស្សាហកម្មទេសចរណ៍ដ៏សំខាន់របស់ថៃ ដោយទទួលបានភ្ញៀវទេសចរចិនចំនួន ១១លាននាក់ នៅមុនជំងឺរាតត្បាតឆ្នាំ២០១៩ ដែលស្មើនឹងជាង ១ភាគ៤នៃលំហូរភ្ញៀវទេសចរទាំងអស់នៅឆ្នាំនោះ។

សូមបញ្ជាក់ថា រដ្ឋាភិបាលថៃ កំពុងកំណត់គោលដៅឲ្យមានការមកដល់នៃភ្ញៀវទេសចរចំនួន ២៨លាននាក់ ធៀបនឹងចំនួនច្រើនបំផុតមុនមានជំងឺរាតត្បាត ដែលភ្ញៀវទេសចរបរទេសជិត ៤០លាននាក់ ក្នុងឆ្នាំ២០១៩ បានចំណាយប្រាក់ ១,៩១សែនកោដិបាត (៥៤,៣៧ពាន់លានដុល្លារអាមេរិក) ដើរកម្សាន្តនៅប្រទេសនេះ៕