ស្របពេលដែលវិធានការរបស់កូរ៉េខាងត្បូងហាមឃាត់ការទទួលទានសាច់សុនខ មនុស្សជាច្រើនដែលជាប់ពាក់ព័ន្ធនឹងឧស្សាហកម្មជម្លោះមានអាយុកាលរាប់សតវត្សរ៍មួយនេះ កំពុងតែតវ៉ាដើម្បីធ្វើឲ្យវាស្របច្បាប់ ។ 

សម្រាប់រយៈពេល ១២ឆ្នាំចុងក្រោយនេះ លោក Lee Kyeong-sig បានបង្កាត់ពូជសុនខចិញ្ចឹមយកសាច់ ដើម្បីលក់ឲ្យភោជនីយ៍ដ្ឋាន ប៉ុន្តែបច្ចុប្បន្នលោកយល់ឃើញថា វាកំពុងធ្វើឲ្យមុខជំនួញរបស់លោកស្ថិតក្នុងស្ថានភាពច្របូកច្របល់ ។ 

កសិករចិញ្ចឹមសុនខយកសាច់វ័យ ៥៥ឆ្នាំរូបនេះ ដែលចិញ្ចឹមសុនខរហូតដល់ ១.១០០ក្បាលនៅខេត្ត Gyeonggi ជាប់ព្រំប្រទល់នឹងទីក្រុងសេអ៊ូល និយាយថា លោកបានព្យាយាមគិតពីជីវិតរបស់លោក ហើយការស្ថិតក្នុងស្ថានភាពហិរញ្ញវត្ថុរបស់លោកបែបនេះ លោកពិតជាគ្មានចម្លើយចំពោះអ្វីដែលលោកអាចធ្វើបាននោះទេ ។ 

ការស្ទង់មតិ Gallup Korea កាលពីឆ្នាំមុន បង្ហាញថា ជិត ២ភាគ៣នៃអ្នកឆ្លើយតប បានប្រឆាំងនឹងការទទួលទានសាច់សុនខ ក្នុងនោះមានតែ ៨ភាគរយប៉ុណ្ណោះ និយាយថា ពួកគេទទួលទានសាច់សុនខក្នុងរយៈពេល ១ឆ្នាំកន្លងមកនេះ ពោលគឺធ្លាក់ចុះពីចំនួន ២៧ភាគរយកាលពីឆ្នាំ ២០១៥ ។ 

គួរឲ្យដឹងថា កាលពីថ្ងៃសុក្រសប្តាហ៍មុន លោក Yu Eui-dong គឺជាប្រធានគោលនយោបាយគណបក្សកាន់អំណាចនិយាយនៅ ថា កូរ៉េខាងត្បូងមានបំណងដាក់បំរាមហាមឃាត់ការទទួលទានសាច់សុនខ ហើយនិងបញ្ចប់ជម្លោះជុំវិញទំនៀមទម្លាប់បុរាណមួយនេះ ស្របពេលមានការយល់ដឹងកើនឡើងពីសិទ្ធិសត្វ ។ 

លោក Eui-dong និយាយថា រដ្ឋាភិបាលកូរ៉េខាងត្បូង និងគណបក្សកាន់អំណាច នឹងណែនាំសេចក្តីព្រាងច្បាប់មួយក្នុងឆ្នាំនេះ ដើម្បីចេញបំរាមហាមឃាត់ការទទួលសាច់សុនខ ហើយបើមានការគាំទ្រទ្វេបក្ស សេចក្តីព្រាងច្បាប់នេះ នឹងត្រូវឆ្លងកាត់សភា ។ 

ក្រុមសិទ្ធិសត្វ បានស្វាគមន៍បំរាមមួយនេះ ខណៈដែលក្រុមប្រជាកសិករចិញ្ចឹមសត្វសុនខយកសាច់ បានដង្ហែក្បួនធ្វើបាតុកម្មនៅមុខសភា ដោយពួកគេនិយាយថា ការសម្រេចចិត្តមួយនេះ ពុំបានអើពើនឹងសិទ្ធិរស់នៅរបស់ប្រជាកសិករនោះទេ ។ 

យោងតាមទិន្នន័យពីរដ្ឋាភិបាលកូរ៉េខាងត្បូង បានឲ្យដឹងថា មាននូវកសិដ្ឋានបង្កាត់សុនខប្រហែល ១.១៥០កន្លែង ផ្ទះសត្តឃាត ៣៤កន្លែង ក្រុមហ៊ុនចែកចាយសាច់សុនខ ២១៩កន្លែង ហើយភោជនីយដ្ឋានបម្រើសាច់សុនខ ប្រហែល ១.៦០០កន្លែង ៕