ប្រទេសកាតាដែលជាអ្នកសម្របសម្រួលបទឈប់បាញ់ បាននិយាយកាលពីថ្ងៃចន្ទ ២៧ ខែវិច្ឆិកាថា បទឈប់បាញ់រវាងអ៊ីស្រាអែល និងក្រុមហាម៉ាស នៅតំបន់ហ្កាហ្សាដែលជិតផុតសុពលភាពត្រូវបានពន្យារពេលពីរថ្ងៃបន្ថែមទៀត  ដោយបង្កើនការរំពឹងទុកថាក្រុមប៉ាឡេស្ទីន នឹងដោះលែងចំណាប់ខ្មាំងលើសពី ៦៩ នាក់ ចាប់តាំងពីថ្ងៃសុក្រសប្ដាហ៍មុនមក។ 

បទឈប់បាញ់នឹងពន្យារការផ្អាកប្រយុទ្ធនៅក្នុងសង្គ្រាមរយៈពេល៧សប្តាហ៍មកនេះរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ដែលបង្កឱ្យមានជម្លោះចុងក្រោយ បន្ទាប់ពីការចូលលុកលុយកាលពីថ្ងៃទី ៧ ខែតុលា ទៅក្នុងប្រទេសអ៊ីស្រាអែលភាគខាងត្បូង ដែលបានសម្លាប់មនុស្សប្រហែល ១.២០០នាក់ និងចាប់មនុស្សប្រមាណ២៤០នាក់ជាចំណាប់ថ្នូរ។  

ជារៀងរាល់ថ្ងៃចាប់តាំងពីបទឈប់បាញ់រយៈពេល៤ថ្ងៃបានចាប់ផ្តើមកាលពីថ្ងៃសុក្រ ក្រុមហាម៉ាសបានដោះលែងចំណាប់ថ្នូរមួយចំនួន ខណៈអ៊ីស្រាអែលបានដោះលែងជនជាតិប៉ាឡេស្ទីនមួយចំនួនដែលខ្លួនបានឃុំឃាំងផងដែរ។  

អ្នកនាំពាក្យក្រសួងការបរទេសកាតាបាននិយាយនៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា កិច្ចព្រមព្រៀងមួយ ត្រូវសម្រេចបាន ដើម្បីបន្តការផ្អាកប្រយុទ្ធសម្រាប់មនុស្សធម៌ រយៈពេលពីរថ្ងៃបន្ថែមទៀតនៅក្នុងតំបន់ហ្កាហ្សាស្ទ្រីប។  

មិនមានការអត្ថាធិប្បាយភ្លាមៗពីអ៊ីស្រាអែលទេ ប៉ុន្តែមន្ត្រីសេតវិមានបានអះអាងថា កិច្ចព្រមព្រៀងមួយត្រូវ សម្រេចបាន៕