គណៈកម្មការនានា នៃ​អនុសញ្ញា​អូតាវ៉ា​រួមនិងអ្នកអង្កេតការណ៍មកពីអង្គការអន្តរជាតិមួយចំនួន តំណាង​អង្គការសហប្រជាជាតិ គណៈកម្មការកាកបាទក្រហមអន្តរជាតិ អង្គការ ICBL និងអង្គការ GICHD បានជួបពិភាក្សាគ្នា ដើម្បីសម្របសម្រួលកិច្ចការដែលពាក់ព័ន្ធនឹងកិច្ចប្រជុំផ្លូវការ និង​ក្រៅ​ផ្លូវការ ខណៈកម្ពុជាធ្វើជាប្រធាននិងជាម្ចាស់ផ្ទះសម្រាប់ឆ្នាំ២០២៤ខាង មុខនេះ។

កិច្ចប្រជុំគណៈកម្មការនានា ដែលបានប្រព្រឹត្តឡើងនាថ្ងៃទី២៧ ខែវិច្ឆិកា ឆ្នាំ​២០២៣នេះ ស្ថិត​នៅ​ក្នុង​ទីក្រុងហ្សឺណែវប្រទេសស្វីស ដើម្បីសម្របសម្រួលកិច្ចការដែលពាក់ព័ន្ធនឹងកិច្ចប្រជុំផ្លូវការ និង​ក្រៅ​ផ្លូ​វការរបស់គណៈកម្មការនៃអនុសញ្ញាសម្រាប់ឆ្នាំ២០២៤ ដឹកនាំដោយឯកឧត្តមបណ្ឌិត លី ធុជ អនុប្រធានទី១នៃអាជ្ញាធរមីននិង ក្នុងនាមជាប្រធានសន្និសីទត្រួតពិនិត្យឡើងវិញលើកទី៥ នៃ​អនុសញ្ញាអូតាវ៉ានាឆ្នាំ២០២៤ខាងមុខនេះ។

គណៈកម្មការនៃអនុសញ្ញាអូតាវ៉ាមានចំនួន៤គឺគណៈកម្មការអនុវត្តមាត្រា៥ គណៈ​កម្មការ​ជួយ​ជន​រងគ្រោះ គណៈកម្មការពង្រឹងកិច្ចសហប្រតិបត្តិការនិងជំនួយ និងគណៈកម្មកា​រ​អនុ​លោម​ភាព​សហប្រតិបត្តិការដែលមានឯកអគ្គរដ្ឋទូត/រាជទូតប្រចាំនៅទីក្រុងហ្សឺណែវជាសមាជិក មកពី​ប្រទេស​កូឡុំប៊ី ស៊ុយអែត ថៃ អង់គ្លេស ស្លូវេនៀ ហ្សំបាវ៉េ ប៊ូគីណូបាសូ ហូឡង់ អាល់ហ្សឺរី ជប៉ុន តួកគី ដាណឺម៉ាក ន័រវេស្ស និងអាហ្វ្រិកខាងត្បូង។ ក្នុងនោះដែរមានអ្នកអង្កេតការណ៍មកពីអង្គការអន្តរជាតិមួយចំនួន តំណាង​អង្គការ​សហ​ប្រជាជាតិ គណៈកម្មការកាកបាទ ក្រហមអន្តរជាតិ អង្គការ ICBL និងអង្គការ GICHD ។

ក្នុងឱកាសនោះឯកឧត្តមទេសរដ្ឋមន្ត្រីលីធុជ ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រី នៃកម្ពុជាបានថ្លែងអំណរគុណដល់គណៈកម្មការ ទាំង៤ និងអ្នកអង្កេតការណ៍​អន្តរជាតិ​ទាំងអស់ ចំពោះកិច្ចគាំទ្រដល់កម្ពុជា ព្រមទាំងបានបន្ត​កិច្ចប្រជុំ​រៀបចំ​ផែនការ​ការងារ​សម្រាប់​អនុវត្តក្នុងឆ្នាំ២០២៤ តាមបែបបទនិងនីតិវិធីរបស់អនុសញ្ញាអូតាវ៉ានេះ ៕ អត្ថបទ៖ ភារម្យ