ភ្នំពេញ៖ គិតក្នុងរយៈពេល ៣ថ្ងៃ នៃការប្រារព្ធពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង​បង្ក្រាប​ការ​ក្លែងបន្លំ (ក.ប.ប.) បើកយុទ្ធនាការចុះត្រួតពិនិត្យចំណីម្ហូបអាហារ ក្នុងនោះ​បាន​រក​បង្គា​មាន​សារធាតុ​ចាហ៊ួយ ២គីឡូក្រាម និងនំចម្រុះមិនអនុលោមលើស្លាកសញ្ញាចំនួន ២០កញ្ចប់ ស្មើ ២គីឡូក្រាម ត្រូវបានរកឃើញ និងដកហូតតាមនីតិវិធី។

ប្រភពក្រសួងពាណិជ្ជកម្ម នៅល្ងាចថ្ងៃទី២៨ ខែវិច្ឆិកា ឆ្នាំ២០២៣នេះ បានឲ្យដឹងថា នៅថ្ងៃទី៣ ដែល​ជាថ្ងៃបញ្ចប់នៃព្រះរាជពិធីបុណ្យអុំទូក មន្ត្រីជំនាញ នៃអគ្គនាយកដ្ឋាន ក.ប.ប. បានបន្ត​នាំយក​រថយន្តពិសោធន៍ចល័តរបស់អគ្គនាយកដ្ឋាន ក.ប.ប. ចុះត្រួតពិនិត្យ​សុវត្ថិភាព​ម្ហូប​អាហារ​នៅ​តាម​ទីតាំងបរិវេណសួនច្បារវត្តបុទុមវត្តី និងសួនច្បារកោះនរា ដើម្បីចូលរួមទប់ស្កាត់ការលក់ និងចែកចាយម្ហូបអាហារមានផ្ទុកសារធាតុគីមីហាមឃាត់ ម្ហូបអាហារហួសបរិច្ឆេទប្រើប្រាស់ ព្រម​ទាំង​ម្ហូបអាហារមិនមានអនុលោមភាព។

ជាលទ្ធផលនៃការវិភាគ ក្នុងចំណោមផលិតផលម្ហូបអាហារ ៣១គំរូ ពិនិត្យឃើញមានបង្គាក្លាសេ ១គំរូ បានពិនិត្យរកឃើញមានចាក់បញ្ចូលសារធាតុចាហ៊ួយ ហើយ​ត្រូវ​បាន​ក្រុម​ការងារ​ដក​ហូត​ចំនួន ២គីឡូក្រាម និងនំចម្រុះពុំមានអនុលោមភាពខូចគុណភាពចំនួន ២០កញ្ចប់ ទម្ងន់​ប្រមាណ​ជិត ២គីឡូក្រាម ដើម្បីយកទៅកំទេចចោល ព្រមទាំង​កំពុង​បន្ត​ស្វែង​រក​ប្រភព​ចែក​ចាយ​បន្ត។ ដោយឡែក ចំពោះទំនិញហួសកាលបរិច្ឆេទប្រើប្រាស់វិញ មិនត្រូវបានរកឃើញទេ។ ក្នុង​ឱកាស​នោះ​ដែរ មន្រ្តីជំនាញនៃអគ្គនាយកដ្ឋាន ក.ប.ប. ក៏បានបញ្រ្ជាប​ចំណេះ​ដឹង​សំខាន់ៗ​មួយ​ចំនួន​ពាក់ព័ន្ធ​នឹងសុវត្ថិភាពម្ហូបអាហារ ដោយតម្រូវឱ្យការដាក់តាំងលក់ត្រូវមានអនាម័យ ជូន​ដល់​អាជីវករ និងអ្នកចូលរួមផងដែរ។

សូមបញ្ជាក់ថា ពាក់ព័ន្ធសកម្មភាពការងារខាងលើនេះ ធ្វើឡើង​ដោយ​មាន​ការ​គិតគូរ និង​យក​ចិត្ត​ទុក​ដាក់​ខ្ពស់​របស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានផ្តោតការ​យក​ចិត្ត​ទុក​ដាក់​ខ្ពស់ បានណែនាំជាប្រចាំ និងចង្អុលបង្ហាញដល់ ឯកឧត្តម ផាន អូន ប្រតិភូរាជ​រដ្ឋាភិបាល​កម្ពុជា ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ដែលជាសេនាធិការ ពង្រឹង​ឱ្យ​ខាន​តែ​បាន​នូវ​ការត្រួតពិនិត្យជាប្រចាំ និងនៅទូទាំងប្រទេស ដើម្បីការពារផលប្រយោជន៍អ្នកប្រើប្រាស់ ក៏ដូចជាការការពារសុខុមាលភាពប្រជាពលរដ្ឋ៕