ថ្លែងនៅក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី១ ខែធ្នូ ឆ្នាំ២០២៣ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ឱ្យដឹងពីការរៀបចំពង្រឹងគុណភាពអប់រំនៅកម្ពុជាបន្ថែមទៀត តាមរយៈការដាក់ចេញនូវវិធានសំខាន់ៗមួយចំនួនដូចជា ពង្រឹងការគ្រប់ គ្រងសាលា និងរៀបចំផែនការអភិវឌ្ឍសាលាជាដើម។ ឯកឧត្ដមបន្តថា ការរៀបចំតេស្តស្តង់ដា និងវាយតម្លៃចំពោះការបង្រៀនរបស់គ្រូ ក៏ជាវិធានការចាំបាច់ផងដែរ។
ដើម្បីពង្រឹងគុណភាពនៅតាមសាលារៀនទូទាំងប្រទេសឱ្យកាន់តែប្រសើរថែមទៀតនោះ ក្រសួងក៏នឹងរៀបចំឱ្យមានពានរង្វាន់សាលាគំរូសម្ដេចមហាបវរធិបតី ដើម្បីឱ្យសាលានៅទូទាំងប្រទេសចូលរួមប្រឡងប្រណាំងផងដែរ។
ប្រព័ន្ធអប់រំនៅកម្ពុជា ត្រូវបានបំផ្លាញទាំងស្រុងនៅក្នុងរបបកម្ពុជាប្រជាធិបតេយ្យ។ ក្រោយការដួលរលំនៃរបបនេះ វិស័យអប់រំនៅកម្ពុជាត្រូវបានស្ដារឡើងវិញ តាមរយៈដំណើរការកម្មវិធីអ្នកចេះតិច បង្រៀនអ្នកមិនចេះសោះ និង អ្នកចេះច្រើន បង្រៀនអ្នកចេះតិច។ តាមរយៈកិច្ចខិតខំប្រឹងប្រែងរបស់ រដ្ឋាភិបាលពីមួយឆ្នាំទៅមួយឆ្នាំឃើញថា វិស័យអប់រំនៅកម្ពុជា មានការរីកចម្រើនជាលំដាប់ សិស្ស និស្សិតកម្ពុជាជាច្រើនបានទៅបន្តការសិក្សានៅតាមប្រទេសនានា និងមានសមត្ថភាពប្រហាក់ប្រហែល ឬ លើសសិស្សនិស្សិតនៅតាមបណ្ដាប្រទេសទាំងនោះថែមទៀត៕ ដោយ៖ គង់ ឌិន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
