ខេត្តកែប៖ នាព្រឹកថ្ងៃសុក្រ ទី១ ខែធ្នូ ឆ្នាំ២០២៣ ក្រសួងទេសចរណ៍ គណៈកម្មការអន្តរក្រសួង និង​រដ្ឋបាលខេត្តកែប បានរៀបចំកម្មវិធីដាំដើមឈើអនុស្សាវរីយ៍ អបអរសាទរ​ពិធី​បុណ្យ​សមុទ្រ លើកទី​១០ ជុំទី៣ ក្រោមប្រធានបទ “ទាំងអស់គ្នាដើម្បីទេសចរណ៍”។

ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងជា​ប្រធាន​គណៈកម្មការ​អន្តរ​ក្រសួងរៀបចំ​ពិធី​បុណ្យ​សមុទ្រ និងឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប បានអញ្ជើញ​ជា​អធិបតី​នៅក្នុងពិធីនេះ ដោយមានការចូលរួមពីថ្នាក់ដឹកនាំក្រសួងទេសចរណ៍ មន្ទីរ អង្គភាព មន្ត្រី​រាជការអាជ្ញាធរមូលដ្ឋាន ប្រជាពលរដ្ឋ ក្រុមយុវជន ស.ស.យ.ក និងក្រុម​យុវជន​កាយរឹទ្ធិ​សរុប​ប្រមាណ ៨០០នាក់ នៅទីតាំងស្របតាមផ្លូវប្របមាត់សមុទ្រជាប់ឆ្នេរអង្កោល ស្ថិតនៅ​ឃុំពងទឹក ស្រុកដំណាក់ចង្អើរ ខេត្តកែប។

កម្មវិធីដាំដើមឈើ រៀបចំឡើងក្នុងគោលបំណង ១)រួមចំណែកដល់ការអភិវឌ្ឍទេសចរណ៍បៃតងនៅកម្ពុជា តាមរយៈការជំរុញសកម្មភាពដាំដើម ឈើ​ឱ្យក្លាយជាផលិតផលទេសចរណ៍ថ្មីមួយប្រកបដោយការទាក់ទាញសម្រាប់ភ្ញៀវទេសចរ (Experiential & memory tourism product) ២)រួមចំណែកទប់ទល់បញ្ហាបម្រែបម្រួលអាកាសធាតុ កាត់បន្ថយ​ប្រភព នៃ​ការ​កើន​ឡើង​កំដៅ​ភពផែន​ដី និងទប់ស្កាត់គ្រោះធម្មជាតិ ដូចជាទឹកជំនន់ខ្យល់ព្យុះជាដើម

៣)ជំរុញ​ប្រែក្លាយយុទ្ធនាការនេះ ជាយន្តការផ្សព្វផ្សាយ​ទេសចរណ៍​បៃតង​កម្ពុជា​ដ៏​មាន​ប្រសិទ្ធភាព និងចូលរួមដល់នយោបាយទាក់ទាញទេសចរឲ្យមកទស្សនាច្រើនដង (Repeat Tourist)។