ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងស្ថាប័នពាក់ព័ន្ធ និងអង្គការដៃគូ ក៏ដូចជាមានការចូលរួមពីវិស័យឯកជន កំពុងខិតខំធ្វើយ៉ាងណា ក្នុងការផ្ដល់សេវាទឹកស្អាត ទៅដល់ប្រជាពលរដ្ឋនៅតាមទីជនបទ ឬជនងាយរងគ្រោះមួយចំនួន ដើម្បីមានទឹកស្អាតប្រើប្រាស់បានគ្រប់គ្រាន់ ឲ្យស្របតាមផែនការនៅឆ្នាំ២០៣០ ។  

ក្នុងពិធីប្រគល់ និងទទួលថវិកាសប្បុរធម៌ចំនួន ៥ម៉ឺនដុល្លារ ពីក្រុមហ៊ុនធានារ៉ាបរង អេទីកា សម្រាប់គាំទ្រសកម្មភាពលើកកម្ពស់វិស័យទឹកស្អាត នៅថ្ងៃទី១ ខែធ្នូ ឆ្នាំ២០២៣ លោក ឆាត់ សុភាព នាយកប្រចាំប្រទេស នៃអង្គការវ័តធើអេតកម្ពុជា (WaterAid) បានលើកឡើងថា កម្ពុជាបានធ្វើដំណើរវែងឆ្ងាយមកហើយ លើការងារទឹកស្អាត និងអនាម័យ ដោយឆ្នាំ២០១៤ ដែលពេលនោះ ប្រជាពលរដ្ឋមានទឹកស្អាតប្រើប្រាស់ប្រមាណ ៤០ភាគរយ នៅទូទាំងប្រទេស ហើយគិតត្រឹមឆ្នាំ២០១៩ បានកើនឡើងដល់ ៨០ភាគរយ ។

លោកបានបន្តថា នៅសល់២០ភាគរយទៀត ស្ថិតនៅក្នុងក្រុមគោលដៅ ក្នុងនោះមានពលរដ្ឋនៅតំបន់ដាច់ស្រយាល តំបន់ជនបទ គ្រួសារមានប្រាក់ចំណូលទាប គ្រួសារដែលមានសមាជិកមានពិការភាពជាដើម ដែលត្រូវកៀគរធនធានជួយពួកគេ លើវិស័យទឹកស្អាត និងអនាម័យ ខណៈមួយឆ្នាំៗ កម្ពុជាត្រូវការថវិកាប្រមាណ ២០០លានដុល្លារ ដើម្បីអនុវត្តការងារនេះ ឲ្យសម្រេចបានគោលដៅអភិវឌ្ឍន៍ប្រកបដោយចីរភាព គោលដៅទី៦ ស្តីពីទឹកស្អាត និងអនាម័យ នៅត្រឹមឆ្នាំ២០៣០ ។

 លោក ឆាត់ សុភាព បានបន្ថែមថា បច្ចុប្បន្នរាជរដ្ឋាភិបាលកម្ពុជា កំពុងខិតខំប្រឹងប្រែងធ្វើការងារនេះបើទោះបីជាមានការលំបាក តាមរយៈការប្រើប្រាស់ថវិកាជាតិ ក៏ដូចជាការកៀគរថវិកាពីប្រភពផ្សេងៗ ដូចជាអង្គការដៃគូ និងវិស័យឯកជននានា ។

លោក ដាតូ ចូហានអាហ្រ្វីហ្វីន ប្រធានក្រុមប្រឹក្សាភិបាល នៃក្រុមហ៊ុនធានារ៉ាប់រង អេទីកា បានលើកឡើងថា សកម្មភាពគាំទ្រដល់កិច្ចការលើកកម្ពស់ទឹកស្អាត និងអនាម័យ គឺជាភារកិច្ចដ៏ចាំបាច់ ដែលតម្រូវឲ្យគ្រប់គ្នាចូលរួមតាមលទ្ធភាព ហើយប្រសិនបើរបាំង ឬឧបសគ្គនៃទឹកស្អាត និងអនាម័យ ត្រូវបានដោះស្រាយ ដោយមានការគាំទ្រពីមនុស្សគ្រប់គ្នា នោះប្រជាជនគ្រប់ទីកន្លែង ពិសេសប្រជាជននៅទីជនបទ នឹងមានសុខភាពល្អ កាត់បន្ថយការចំណាយ លើការថែទាំសុខភាព ព្រមទាំងអាចសន្សំសំចៃថវិកា សម្រាប់ទុកបំពេញតម្រូវការផ្សេងៗនៅក្នុងគ្រួសារផងដែរ ហើយការចូលរួមនេះ គឺមានគោលដៅចង់ឲ្យពលរដ្ឋកម្ពុជា មានសុខភាពល្អ ។

គួរបញ្ជាក់ថា ថវិការបស់ក្រុមហ៊ុនធានារ៉ាប់រង អេទីកា នេះ ត្រូវអនុវត្តលើកកម្ពស់សេវាទឹកស្អាត ជូនប្រជាពលរដ្ឋនៅក្នុងខេត្តកណ្ដាល នឹងរំពឹងថាផ្ដល់ផលប្រយោជន៍ដល់ពលរដ្ឋប្រមាណ ២០០០នាក់ ក្នុងរយៈពេល៦ខែ ៕ អត្ថបទ ៖ បាន សុខរិទ្ធិ