សន្និសីទវេជ្ជសាស្រ្តឆ្នាំដំបូងរបស់សមាគមគ្រូពេទ្យស្ម័គ្រចិត្តយុវជនសម្ដេចតេជោ ហៅកាត់ថា TYDA រយៈពេល២ថ្ងៃបានបញ្ចប់ទៅដោយជោគជ័យ និងទទួលបានការកោតសរសើរពីក្រសួងសុខាភិបាល និងអ្នកចូលរួមប្រមាណ ៨០០ នាក់។
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាអធិបតីក្នុងពិធីបិទសន្និសីទប្រចាំឆ្នាំរបស់សមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) នាល្ងាចថ្ងៃទី ៣ ខែធ្នូ ឆ្នាំ២០២៣ ព្រមទាំងបានវាយតម្លៃខ្ពស់ចំពោះសន្និសីទរយៈពេល២ថ្ងៃ ដែល TYDA បានរៀបចំឡើងជាលើកដំបូង ដែលបានផ្ដល់ឱកាសដល់សិក្ខាកាមទទួលបានចំណេះដឹងវេជ្ជសាស្រ្តថ្មីៗ បន្ថែម ដើម្បីយកទៅអនុវត្តក្នុងជំនាញរបស់ខ្លួនប្រកបដោយវិជ្ជាជីវៈ និងជាពិសេសដើម្បីពង្រឹងនូវការអនុវត្តវេជ្ជសាស្រ្តឱ្យបានល្អប្រសើរ ក្នុងលើកកម្ពស់វិស័យសុខាភិបាល។
ថ្លែងក្នុងពិធីបិទសន្និសីទដែលរៀបចំដោយសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) ឯកឧត្តមរដ្ឋមន្រ្តីបានមានប្រសាសន៍ ជំរុញ និងលើកទឹកចិត្តដល់សិក្ខាកាមទាំងអស់ត្រូវរៀបចំខ្លួនធ្វើជាមនុស្សល្អជាមុនសិន ដើម្បីឈានឆ្ពោះទៅជាគ្រូពេទ្យល្អ។ បន្ថែមពីនេះ ឯកឧត្តមក៏បានអំពាវនាវដល់ថ្នាក់ដឹកនាំក្នុងវិស័យសុខាភិបាលទាំងអស់បន្តចូលរួមគាំទ្រជាមួយបេសកកម្មរបស់សមាគមន៍គ្រូពេទ្យស្ម័គ្រចិត្តយុវជនសម្ដេចតេជោ និងចូលរួមការអភិវឌ្ឍ ព្រមទាំងការធ្វើកំណែទម្រង់វិស័យវេជ្ជសាស្រ្ត ដើម្បីកសាងធនធានមនុស្សក្នុងវិស័យសុខាភិបាល។
សន្និសីទរយៈពេល២ ថ្ងៃ ដែលរៀបចំដោយសមាគមគ្រូពេទ្យស្ម័គ្រចិត្តយុវជនសម្ដេចតេជោ ដែលហៅកាត់ថា TYDA ធ្វើឡើងក្រោមប្រធានបទ «ការអនុវត្តវេជ្ជសាស្រ្តឱ្យបានល្អប្រសើរ» ក្នុងនោះដែលសមាគមបានអញ្ជើញវាគ្មិនឯកទេសជំនាញៗ មកពីស្ថាប័នជាតិ និងអន្តរជាតិ ដើម្បីចែករំលែកបទពិសោធន៍ព្យាបាល និងលើកឡើងពីទ្រឹស្ដីថ្មីៗក្នុងវិស័យវេជ្ជសាស្រ្តមកបង្ហាញជូនសិក្ខាកាមទាំងអស់ប្រមាណ ៨៩០នាក់។ សន្និសីទ២ ថ្ងៃ បានបែងចែងជា ៣៣ ប្រធានបទសំខាន់ៗ ដែលផ្ដោតលើការព្យាបាលដោយប្រើថ្នាំ ក្នុងកាព្យាបាលដោយវះកាត់ ក្នុងនោះមានដូចជា ការព្យាបាលជំងឺមហារីក ជំងឺបេះដូង រោគស្រ្តី និងជំងឺកុមារជាដើម។
លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អនុប្រធានក្រុមប្រឹក្សាភិបាលនៃក្រុមគ្រូពេទ្យស្ម័គ្រចិត្ត TYDA បានមានប្រសាសន៍ថា ក្នុងពិធីបើកសន្និសីទកាលពីថ្ងៃទី ២ធ្នូ ថា សន្និសីទដែលបានធ្វើឡើងនាពេលនេះពិតជាមានសារៈសំខាន់ ដែលបានរួមចំណែកលើកកម្ពស់វិស័យសុខាភិបាលនៅក្នុងព្រះរាជាណាចក្រកម្ពុជាឱ្យកាន់តែមានភាពល្អប្រសើរឡើង។ លោកជំទាវបន្តថា TYDA គឺជាតួអង្គពិសេសដែលបានរួមចំណែកជាមួយរាជរដ្ឋាភិបាល ក្នុងការទប់ស្កាត់ និងព្យាបាលអ្នកជំងឺក្នុងសមរភូមិកូវីដ១៩ ដែលបានរាត្បាតយ៉ាងខ្លាំងនាពេលកន្លងមក។ លើសពីនេះ ១១ ឆ្នាំនៃបេសកកម្មមនុស្សធម៌ក្នុងវិស័យសុខាភិបាល TYDA បានអនុវត្តយ៉ាងការងារយ៉ាងខ្ជាប់ខ្ជួនស្របតាមផែនការសកម្មភាពដែលបានដាក់ចេញ និងជាពិសេសបន្តចូលរួមជាមួយរដ្ឋាភិបាលអាណត្តិទី៧ នេះ ដើម្បី ក្នុងការពង្រីកសេវាព្យាបាល និងពង្រឹងសុខភាពសាធារណៈ ព្រមទាំងបង្ខិតសេវាព្យាបាលឱ្យកាន់តែជិតប្រជាពលរដ្ឋ ព្យាបាលជំងឺជូនប្រជាពលរដ្ឋដោយឥតគិតថ្លៃ ក្នុងគោលដៅជួយកាត់បន្ថយភាពក្រីក្រនៅក្នុងសហគមន៍៕ អត្ថបទៈ ជាតា