ជនមានពិការភាព និងមន្រ្តីបម្រើអង្គការសកម្មភាពលើពិការភាព និងអភិវឌ្ឍ ហៅកាត់ ADD International លើកឡើងថា រាជ​រដ្ឋាភិបាល​បាន​យក​ចិត្ត​ទុក​ដាក់​ខ្ពស់​លើ​ការ​ផ្តល់​ឱកាស​ការងា​រ​ជូន​ជន​មានពិការភាព។

ស្របពេលនៅថ្ងៃទី៤ ខែធ្នូ ឆ្នាំ២០២៣ រាជរដ្ឋាភិបាលរៀបចំ​ប្រារព្ធ​ទិវា​ជន​មានពិការភាព​កម្ពុជា​ លើកទី​២៥ និង ទិវាជនមានពិការភាពអន្តរជាតិលើកទី៤១ ក្រោមប្រធានបទ «ដំណោះ​ស្រាយ​ប្រកប​ដោយ​នវានុវត្តន៍ ដើម្បីសង្គមមួយមានផាសុកវត្ថុ និងសមធម៌» មានជនមានពិការភាព និង​មន្រ្តី​ទទួល​បន្ទុកលើកិច្ចការសិទ្ធិជនមានពិការភាព បានប្រាប់BTV News ឲ្យដឹងថា ផ្អែក​លើ​ផ្នត់​គំនិត និងការគាំទ្រ រួមទាំងលើក​ទឹកចិត្ត​ពី​រាជរដ្ឋាភិបាលបា​ន​ធ្វើ​ឲ្យ​ការ​ចូលរួម​របស់​ជន​មាន​ពិការភាព​កាន់តែច្រើនជាងមុនក្នុងសកម្មភាពសង្គម និងការងារទូទៅក្នុងស្ថាប័នរដ្ឋ និងឯកជន។

លោក ផាន សុផល ជនមានពិការភាព និងជាជំនួយការគម្រោងរួមគ្នាដើម្បីផ្លាស់ប្ដូររបស់អង្គការ ADD បានលើកឡើងថា ក្នុងសកម្មភាពការងារប្រចាំថ្ងៃរវាងជនមានពិការភាព គឺមាន​ការ​ទទួល​ស្គាល់ និងលើកទឹកចិត្ត ហើយផ្តល់ឱកាសកាន់តែប្រសើរ ដែលនេះ​ឆ្លុះបញ្ចាំង​ចំពោះ​ការ​បញ្ឈប់​ការ​រើស​អើងចំពោះជនពិការ។

ជាមួយគ្នា មន្ត្រីទទួលបន្ទុកលើកិច្ចការនៃសិទ្ធិរបស់ជនមានពិការភាពបានសមនតែងការពេញចិត្ត និង​គាំទ្រ​ចំពោះ​ការ​ដាក់​ចេញ​នូវ​គោល​នយោបាយ​ទាំង​ឡាយ​របស់​រាជ​រដ្ឋាភិបាល​ជូន​ជន​មាន​ពិការភាព​ក្នុង​ការផ្ដល់​ឱកាស​ឲ្យ​ពួក​គេ​បាន​ចូលរួម​ក្នុង​ការ​បង្ហាញ​សមត្ថភាព និង​លទ្ធភាព​ទាំង​វិស័យ​រដ្ឋ និងឯកជន។

នៅក្នុងឆ្នាំ២០២៣ នេះ មានជនមានពិការភាពជាង ៧០០០នាក់ ត្រូវបាន ស្ថាប័នរដ្ឋ និង​ឯកជន​ទទួល​ឱ្យ​ចូលបម្រើការងារ ខណៈរាជរដ្ឋាភិបាល​បានបន្ត​លើកទឹក​ចិត្ត​ដល់​ស្ថាប័ន​នានា​ត្រូវ​ចូលរួម​លើក​កម្ពស់​ស្មារតី និងសមត្ថភាព​របស់​ពួក​គេ​ធានា​នូវ​ការ​ធ្វើ​បរិយាប័ន្ន​សម្រាប់​ជន​មាន​ពិការ​ភាព​៕​ អត្ថបទ៖ សេក ឧត្តម