ខ្មាន់កាំភ្លើងបានវាយប្រហាររថយន្តក្រុងមួយគ្រឿងនៅជិតទីក្រុង ឈីឡាស (Chilas) ភាគខាងជើងប្រទេសប៉ាគីស្ថានកាលពីថ្ងៃសៅរ៍ (០២ ធ្នូ) ដោយបានសម្លាប់អ្នកដំណើរចំនួន ៨នាក់ និងរងរបួសយ៉ាងហោចណាស់ ១៥នាក់ នេះបើតាមក្រុមមន្ត្រីស្រុក និងតំបន់។

លោក មុហាមេដ អាលីចូហា (Muhammad Ali Johar) អ្នកនាំពាក្យរបស់រដ្ឋាភិបាលក្នុងតំបន់បាននិយាយថា ក្រុមសកម្មប្រយុទ្ធបានបើកការបាញ់ប្រហារលើរថយន្តក្រុងកាលពីល្ងាចថ្ងៃសៅរ៍ ហើយអ្នករងរបួសត្រូវបានបញ្ជូនទៅមន្ទីរពេទ្យក្នុងតំបន់។

រដ្ឋមន្ត្រីមហាផ្ទៃរបស់រដ្ឋាភិបាលក្នុងតំបន់រូបនេះបានប្រាប់សន្និសីទសារព័ត៌មាននៅតំបន់ ហ្គីលជីត (Gilgit) ថាខ្មាន់កាំភ្លើងទាំងនោះបានបាញ់ទៅលើរថយន្តក្រុងពីភ្នំ។ មិនមានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះភ្លាមៗទេ ហើយហេតុផលសម្រាប់ការបាញ់ប្រហារនេះនៅមិនទាន់ច្បាស់នោះឡើយ។

ទីក្រុង ឈីឡាស ស្ថិតនៅក្នុងតំបន់ភ្នំ ហ្គីលជីត បាល់ទីស្ថាន ជិតខេត្ត ឃីប៊ឺ ផាកទុងវ៉ា (Khyber Pakhtunkhwa) ជាទីដែលការវាយប្រហារបានកើនឡើងក្នុងប៉ុន្មានឆ្នាំថ្មីៗនេះ រួមទាំងការអះអាងមួយចំនួនដោយក្រុមតាលីបង់ជនជាតិប៉ាគីស្ថាន ឬក្រុម តេរេក តាលីបង់ប៉ាគីស្ថាន(TTP) ផងដែរ។

ទីក្រុង ឈីឡាស គឺជាកន្លែងកម្សាន្តឈប់សម្រាកដ៏ពេញនិយមសម្រាប់ភ្ញៀវទេសចរ ព្រមទាំងនៅជិតទំនប់កំពុងសាងសង់ ដែលគាំទ្រដោយប្រទេសចិន៕